Read lumasaaba Tsizabuli 109 Bible Online

Tsizabuli 109 - lumasaaba bible

Tsizabuli 109

¹Wele wase isi ise nisaaya, n'unjeete!

²Khulwekhuuba baboonaki ni babeeyi baanomakho tsilomo tsiimbi; baanganikhakho bibiindu bye bubeeyi.

³Baantsibotokhelela ise nga bakanikha tsilomo tsireera buubiiyile bwonyene, baantsibwakala ise akhali ilomo yoosi ta.

⁴Mu shifwo she khukhuungana nga ise ni mbakana nibo, baambiiyila ise ikhaba nga ise imbaloombela tsisaala.

⁵Mu shifwo she khukhukholela ise biilayi nga ise ni mbakholela nibo, baakhola khusiise bibiindu biibi, mu shifwo she khukhuungana ise, nibo baambiiyila.

⁶Beroboreere umukayi uuli umulyaanga abe niye ukhala kumusaango kwaabwe, khayo uyo abe niye ubawabila kumusaango.

⁷Khali babawotsisile kumusaango kubafuura, khali bujulisi bweewe bubweene bukilile baamukhalila kumusaango.

⁸Khali afwiile khaangu arura khu shibala, ibawo umuundu ukuundi uwiila mu shifwo sheewe.

⁹Khali babaana beewe bekelile baafuubi, n'umukhasi weewe khali ekelile namulekhwa.

¹⁰Khali babaana beewe bekelile baatiimi busa, bakyeendana nga basabilisa busa biilyo. Khali babatimisile khukhwaama mu makubili keesi bamenyamo.

¹¹Khali abo babaamubaantsa bayaayile byeesi ali ni nabyo byoosi, khali babaandu be bulafu banuulile buyiindifu bweesi ali ni nabwo.

¹²Khali s'abelewo umuundu na mutweela umwokesanisa shiisa ta, namwe akhaba uwokesanisa baafuubi beewe shiisa ta.

¹³Khali lisaaye lyeewe lifwiile liwawo, khali s'abelewo ubashebulila mu muboolo kukwiitsa ta.

¹⁴Khali Wele s'eyakhiile bibyoonako ikhaba bye bakuuka beewe ta, ikhaba ni bibyoonako bya maayi weewe, Wele khali samwiyakhiile ta.

¹⁵Khali Umukasya alobile khubeyakhila bibyoonako byaabwe, ni kamasiina ke basaali beewe ni bakuuka beewe, alekha khubawo khu shibala ukashebulila ta.

¹⁶Khulwekhuuba niye s'abakho ni shiisa isi babaandi ta, khurusakho indi abe amiinikhilisa bataambi, ni nabo abe babaawetsekheleele kamaani.

¹⁷Khayo bitsubo bimwiikhekho; khulwekhuuba abe waasiima khuutsuba babaandi! Abe niye s'akana khuuwa babaandi tsikhabi ta; khali naye s'afunile ikhabi yoosi ta!

¹⁸Niye ebotookhelesa umweene ni bitsubo isi babaandi; khali naye bimwingile mu mubili byoolela ilala khu makuumba keewe.

¹⁹Khali bitsubo bimwihaambilekho biba busa nga shikwaaro she khu mubili kweewe, biba busa nga lukhoba lweesi ebowa mu shikuute.

²⁰Abo boosi babaanganikhakho bibiindu biibi, ni babaambayilisa ise, khali Umukasya abelihaasile.

²¹Ne ari Wele, Umukasya wase, nga ni shaakhila lisiina lyoowo, n'untsilihasile. Khulwe khuukana khwoowo khukhuukhakama ta, n'umbonese ise.

²²Khulwekhuuba ise ndi umutaambi naluundi ise ndi mu mutaambo.

²³Buulamu bwase buli aambi khuwawo; ise indaamukha busa ni imbewo nga isike isi basisakuule khukhwaama khu shisaala.

²⁴Ise naaweelemo kamaani khulwe khuubuya intsala; naatenyile naaramire kamakuumba busa.

²⁵Ise niye isi bekhalila khuukhoma; nga bamboonekho basiisikha busa kimirwe kyaabwe.

²⁶O Umukasya Wele wase, n'unjeete ise; khulwe khuukana khwoowo khukhuukhakama ta, n'umbonese.

²⁷O Umukasya, khayo babaaramile bamanye bari iwe wamweene, niye ushikholile khulwe kamaani koowo.

²⁸Ikhaba nga nibo batsuba, ne iwe n'ubawe tsikhabi; ikhaba nga beniinisa angaaki, ne kane bawaambisibwe kamaŋaanyu; ne ise umwakaanisi woowo kane imbe nga nikhoya.

²⁹Khali abo babaambayilisa ise betsusibwile ni khuuswaala; khali khuuswaala khubebotookhelele khubewaambakho khuba busa nga shikwaaro.

³⁰Kane ise niimbile Umukasya nga imuruuya; kane ise imuruuyile mu lituuli lye babaandu.

³¹Kane ise imuruuye khulwekhuuba niye ayeeta bataambi, khuubamusa khukhwaama isi abo babaabamiinikhilisa.