Read lumasaaba Tsizabuli 111 Bible Online

Tsizabuli 111 - lumasaaba bible

Tsizabuli 111

¹Ruuya Umukasya. Nga babaandu ba Wele bakhosefu baabusaane khuuloomba, ise kane isiime Umukasya, naluundi imuruuye naabi.

²Bibiindu byeesi Wele akhola bili biilayi naabi naluundi biyaangisa. Abo boosi beesi bikholwa bya Wele bikhoyesa, babinyayila naabi.

³Bibiindu byoosi byeesi Umukasya akhola bili bye shiriifwa naluundi bye angaaki; ni bunyala bweesi araambisa khuurawo bwa ŋali, sibulyakama ta.

⁴Wele waayokesanisa babaandu boosi bikholwa byeewe bye shiriifwa; naluundi Umukasya ali uwe shiriifwa ni bubweela.

⁵Abo babaamwisaaya, Umukasya abawa bye khuulya; naluundi buli busheele ashebulila khuukhola bibiili mu ndakaano yeewe.

⁶Umukasya wokesanisile babaandu beewe kamaani ke angaaki, mu khuwaamba busikha bwe kamanaambo kakaandi waabuwa babaandu beewe.

⁷Byeesi Wele akhola busheele bili bibiyikinikhikha, naluundi bili bya ŋali, ni kamakaambila keewe keyikinikhikha.

⁸Khulwekhuuba kaliwo biilo ni biilo, bali ni khuukaloondelela ni bukwalaafu.

⁹Wele amataayi aamusa babaandu beewe; naluundi aliliinda indakaano yeewe ni nabo biilo ni biilo. Umukasya ali umukwalaafu naluundi baakha khuumuruuya.

¹⁰Kamakhula koosi karakikhila mu khwisaaya Umukasya; abo boosi babaamwisaaya bali ni kamakhula kamalayi naabi. Umukasya kane aruuyibwe biilo ni biilo.