Read lumasaaba Tsizabuli 115 Bible Online

Tsizabuli 115 - lumasaaba bible

Tsizabuli 115

¹Khulwe khuukana khwoowo khuukali ni bubweela bwoowo, O Umukasya, khayo lisiina lyoowo libe nilyo liliisibwamo shiriifwa, ne akhuba indi ifwe nibo khukhwisibwamo shiriifwa ta.

²Lwashiina kila kamanaambo kereeba kari, “Wele waabwe ali waheena?”

³Wele weefwe ali mwikulu; naluundi akhola buli shishiindu sheesi niye aba waakhalilewo khuukhola.

⁴Ba wele be kamanaambo kakaandi babaali bibuumbe busa, baabuumbibwa khukhwaama mu zaabu ni mu feeza.

⁵Ikhaba nga bibuumbe bilikho kiminwa, ne sibinyala byaakanikha ta, ikhaba nga baabirakho tsimoni, ne sibinyala byaabona ta.

⁶Ikhaba nga baabirakho kamaru, ne sibinyala byaawulila ta; ikhaba nga baabirakho kamoolu, ne sibinyala byaawunyila ta.

⁷Kamakhono keesi baabirakho sikawaamba shishiindu ta, bikele byeesi baabirakho sibikyeenda ta, naluundi bibuumbe bino sibikanikha ta.

⁸Abo babaabibuumba ni nabo bali busa nga bibuumbe byeene ibyo.

⁹Inywe babaandu babaali ba Isiraeli, muli ni khukhwiyikina Umukasya. Umukasya ali niye ubatseeta inywe nga ingabo yeenywe.

¹⁰Babaandu be nda iya Aroni umusaayi, muli ni khukhwiyikina Umukasya, niye ali ubatseeta inywe nga ingabo yeenywe.

¹¹Inywe mweesi babesaaya Umukasya, muli ni khuumwiyikina, niye ali ubatseeta inywe nga ingabo yeenywe.

¹²Umukasya waakhuyeetile ifwe naabi; kane akhuwe ifwe tsikhabi. Kane awe ba Isiraeli boosi tsikhabi ni be inda iya Aroni boosi.

¹³Abo boosi babesaaya Umukasya, ikhaba naanu, kane abawe tsikhabi tsyeewe.

¹⁴Khali Umukasya ayeetile babaana boowo ni lisaaye lyoowo libalaaha.

¹⁵Khali Umukasya uwabuumba likulu ni shibala, akhuweele iwe ikhabi.

¹⁶Umukasya umweene waayibiikhila likulu, ne shibala waashiwa babaandu.

¹⁷Abo babaamala khuufwa sibaruuya Umukasya ta, namwe ikhaba abo babaatsya imakoombe.

¹⁸Ne ifwe kane khuruuye Umukasya, aluno ari ni kimiboolo kyoosi. Ruuya Umukasya.