Read lumasaaba Tsizabuli 116 Bible Online

Tsizabuli 116 - lumasaaba bible

Tsizabuli 116

¹Ise ingana naabi Umukasya, khulwekhuuba waayilamo kamalilo kaase.

²Mu buulamu bwase bwoosi, kane ise nisaayatsake Umukasya, khulwekhuuba nga ni naloomba, niye aantsilamo.

³Ise kumutaambo kwaantsolisila ilala imakoombe; naaba ni khuurya nga nambaasa ndi ingana khufwa, nabira mu khutaambisibwa khuukali.

⁴Ise naloomba isi Umukasya nga inoma ndi, “O Umukasya, naakhwikoontseleele, n'uwonese buulamu bwase!”

⁵Umukasya ali ni shiisa, Wele weefwe ali umukwalaafu naluundi eyakhila.

⁶Umukasya ayeeta abo babaali bataambi; ise nga ni naba mu mutaambo, aambonesa.

⁷Bulamu bwase kane bwiilemo kamaani nga ni bwaba, khulwekhuuba Umukasya wamaambiile ise shiisa.

⁸Khulwekhuuba O Umukasya, iwe waawonesele buulamu bwase khukhwaama imakoombe, iwe wambonesele ise khuulila kamasika ni khuureremukha naakwa aasi.

⁹Nashiryo ise kane imenye khu shibala khuno, nga ikhola byeesi Umukasya aloma.

¹⁰Ikhaba nga ise abe naloma ndi, “Ise ndi mu mutaambo kumukali”, ne narama nga ndi khuufukiilila mu Mukasya.

¹¹Ise nga ndi mu ngunyi ingali naloma ndi, “Babaandu sibeyikinikhikha ta.”

¹²Shiina sheesi kane ise imbe Umukasya, khulwe biilayi byeesi akholele ise?

¹³Kane ise imbaaneyo isi Umukasya shiwaanwa she iviini khuumusiima niye, naluundi kane ise imwisaayatsake.

¹⁴Ise nga ndi mu lubusano lwe babaandu boosi, kane ise noolelese byeesi nasuubisa Umukasya ndi kane ikhole.

¹⁵Umukasya kumutaambo kumuwaamba, nga mutweela khu baandu babaamwisaaya wafwiile.

¹⁶O Umukasya, ise ndi ukhwisaaya iwe; ise ndi busa umukulwa isi iwe, ise ndi umwaana w'omwakaanisi woowo.

¹⁷Kane ise imbaaneyo isi Umukasya shiwaanwa she khuumusiima, naluundi kane ise imwisaayatsake.

¹⁸Nga babaandu babaakhwisaaya iwe babusaane mu Liisaayilo Liikhulu mu Yerusalemu, kane ise noolelese ibyo byeesi nasuubisa Umukasya indi kane ikhole. Ruuya Umukasya.