Read lumasaaba Tsizabuli 118 Bible Online

Tsizabuli 118 - lumasaaba bible

Tsizabuli 118

¹Ruuya Umukasya, khulwekhuuba ali umulayi, khuukana khweewe sikhwakama ta, khuliwo biilo ni biilo.

²Ruuya Umukasya, khulwekhuuba busheele ali umulayi, khuukana khweewe khukhuukhakama ta khuli khwe biilo ni biilo.

³Khayo ba Isiraeli bakuukuule nga baloma bari, “Khuukana khweewe khukhuukhawawo ta, khuli khwe biilo ni biilo.”

⁴Khayo abo babesaaya Umukasya bakuukuule bari, “Khuukana khweewe khukhuukhakama ta, khuli khwe biilo ni biilo.”

⁵Ise naba mu mutaambo nalilila Umukasya; Umukasya welamo khulila khwase, wambonesa.

⁶Umukasya ali khu luwaande lwase, ni nashiryo ise mbaawo sheesi niyembelela ta. Naanu unyala waakholakho ise buubi bwoosi?

⁷Umukasya ali ni nase nga umuyeeti wase, kane ise inyalise khufuura baasiku baase.

⁸Umuundu weyikina Umukasya khumuliinda, shiminyisa ni eyikina babaandu baashe.

⁹Umuundu weyikina Umukasya, shiminyisa khukhwiyikina babaandu babaali ni kamaani ni bunyala.

¹⁰Kamanaambo koosi keetsa kantsibwakala ise; ne khulwe kamaani k'Omukasya, ise nakafuura koosi mu busoolo.

¹¹Boosi baantsibotokhelela, baantsibwakala; ne ilala khulwe kamaani k'Omukasya, ise nabafuura boosi mu busoolo.

¹²Baantsibwakala baantsibotokhelela nga intsushi, ne baamamukha busa nga ni woosha bunyaasi bubwoomu; ilala khulwe kamaani k'Omukasya ise nabafuura boosi mu busoolo.

¹³Baasiku baaminya ise kamaani, beetsa khuufuura ise mu busoolo, ne Umukasya waandimiilila ise naabafuura.

¹⁴Umukasya ali niye kamaani kaase kakaasoolanila ise, niye wekelile buwonesi bwase.

¹⁵Tsikaambi tsye kamaye ke ba Isiraeli balikho bakhupa liyoombo khulwekhuuba bawulile, “Kamaani k'Omukasya niko kakaafuurire mu busoolo.”

¹⁶Kamaani k'Omukasya kaafuurire mu busoolo, kamaani k'Omukasya keesibwemo lukoosi.

¹⁷Ise singene ifwe ta; akhali kane ise imbe umulamu; naluundi ise imboolele babaandu biilayi byeesi Umukasya akhola.

¹⁸Umukasya wambeele ise shitaambiso she kamaani, ne wawonesele buulamu bwase.

¹⁹Ni muntsikulilewo shilibwa she Liisaayilo Liikhulu, ise inyalise khubiriramo intsye isiime Umukasya.

²⁰Shino nisho shilibwa sh'Omukasya, bakhosefu nimwo mweesi babirira.

²¹Ise ikhuruuya iwe khulwekhuuba iwe wanjeetile ise; naluundi iwe wekelile niye buwonesi bwase.

²² Libaale liliraambisibwa mu khwombakha tsintsu lyeesi babombashi baloba khuraambisa, ari lyekelile nilyo kusiindi kwe intsu.

²³Umukasya umweene niye ukhola bibiindu bino; bili biibiyaangisa mu moni tsyeefwe.

²⁴Shino nisho shifukhu she khuushebulilakho nga Umukasya n'afuura baasiku beefwe mu busoolo, khayo khwikhoye naluundi khusangaale.

²⁵O Umukasya, ifwe khwaakhwikoontseleele n'ukhuwonese, n'ukhuyeete ifwe khwoolelese byeesi khukhola.

²⁶Khayo Wele abiite tsikhabi khuuyo uwingila mu Lisaayilo mu lisiina ly'Omukasya! Ifwe khukhuuli mu Lisaayilo ly'Omukasya khukhuruuya iwe.

²⁷Wele ali Umukasya, naluundi wakhunyalisile ifwe khufuura mu busoolo, inywe mumuuli mu mukhweeso kukuuyila biwaanwa, wuutsa kamasaafu khulwe isangaalo, khukhwoolisila ilala khu sheeso shikhulu.

²⁸Iwe uli Wele wase, naluundi kane ise ikhuruuye iwe; iwe uli Wele wase, naluundi kane ise imboolele babaandu boosi nga n'uli uwe kamaani.

²⁹Ruuya Umukasya khulwekhuuba ali umulayi naabi; khuukana khweewe khukhuukhakama ta, khuli khwe biilo ni biilo.