Read lumasaaba Tsizabuli 119 Bible Online

Tsizabuli 119 - lumasaaba bible

Tsizabuli 119

¹Babaandu babaamenya buulamu bwaabwe nga baloondelela kamakaambila k'Omukasya, bali n'ikhabi.

²Babaandu babaamwisaaya ni kimyoyo kyaabwe kyoosi nga baloondelela byeesi niye abalakila khukhola, bali n'ikhabi.

³Babaandu abo babaaba nga sibalikho shiibi shoosi sheesi bakhola ta, ne akhali baba baloondelela byeesi iwe ukana babaandu bakhole.

⁴O Umukasya, iwe wamweene walakila uri babaandu bali ni khuukaloondelela kamakaambila koowo.

⁵Khali buulamu bwase buwandalaliile mu khuwaamba kamakaambila koowo!

⁶Ni nashiryo, ise nga noomisiile tsimoni tsyase khu makaambila koowo, ise singane imbekho ni khuuwaambisibwa kamaŋaanyu ta.

⁷Ise nga neyikile bilakilo byoowo nga ni bili bya ŋali, kane ise ikhuruuye iwe akhali khukhwikanakana ta.

⁸Iwe ukhaandekha ise naaba busa senyene ta; kane ise inoondelele indeekela yoowo.

⁹Umuundu umuhele anyala aryeena waaloondelela kumukhoosi kumukhosefu? Anyala waashikhola nga waaloondeleele Kamakaambila koowo.

¹⁰Iwe ukhaandekha ise naarura khu makaambila koowo naatiimatiima busa ta; ise neetsile isi iwe uuli ni kumwoyo kwase kwoosi.

¹¹Mu mwoyo kwase ise ingana naabi byeesi iwe wasuubisa, khulwekhuuba ise singana noonaka shishiindu shoosi mu moni tsyoowo ta.

¹²O Umukasya, ise ikhusiima iwe naabi, n'undeekele ise kamakaambila koowo.

¹³Mu buulamu bwase kane ise niimbe busa kamakaambila keesi iwe warawo.

¹⁴Ise nikhoyela mu khuuloondelela indeekela yoowo, khuumiinyisakho umuundu n'ekhoyela mu bye buyiindifu.

¹⁵Ise kane niyike kamakaambila koowo, inoondelele byeesi iwe uleekela.

¹⁶Ise ifuna kumwikhoyo mu khuuloondelela kamakaambila koowo; ise siinyala nebilila ilomo yoowo ta.

¹⁷Iwe n'uwaambile umwakaanisi woowo shiisa, nio ise imenyewo luleeyi nga inondelela kamakaambila koowo.

¹⁸Iwe n'untsikule tsimoni tsyase, nio ise inyalise khuuteekeela bye kamakaanga bibyaama mu makaambila koowo.

¹⁹Ise ndi busa umwiitswa khu shibala, ukhaambisakho kamakaambila koowo ta.

²⁰Buli imbuka yoosi, kumwoyo kwase kwetsuule kameelu ke khuumanya kamakaambila koowo.

²¹Abo babaali banywaanywa naluundi babawuraana balekha khuuloondelela kamakaambila koowo ta, iwe ubarakho shitsubo.

²²N'undusekho ise khutyaaba khwaabwe ni tsikhomo tsaabwe, khulwekhuuba ise nawaamba kamakaambila koowo.

²³Abe ikhaba nga baawuli bekhala nga bakholela ise tsimbomelo, ne ise nga umwakaanisi woowo kane ninaaneyo naabi khu ndeekela yoowo.

²⁴Khulwekhuuba kamakaambila koowo kaanderera ise kumwikhoyo, umwo nimwo mweesi ise naamisa kamakhula.

²⁵Ise ndi aambi khuutsya imakoombe, iwe n'ungobosemo ise kamaani, khuuloondekhana ni sheesi iwe wasuubisa.

²⁶Ise ni naakhwilootsela iwe kumutaambo kwase, iwe wandimiilila; ari n'undeekele kamakaambila koowo.

²⁷Iwe n'unjeete ise imanye sheesi kamakaambila koowo kakana ise ikhole; nio ise inyalise khukhwibaasa khu bye kamakaanga byeesi iwe ukhola.

²⁸Ise kumutaambo kukana khukhuuntsira, iwe n'umbe ise kamaani khuuloondekhana ni byeesi iwe wasuubisa.

²⁹N'undusekho intsibirisa imbi yoosi, umaambile ise shiisa undeekele kamakaambila koowo.

³⁰Ise naakhalilewo khuuwuliilisa byeesi iwe uloma, naakhalilewo khuuloondelela byeesi indeekela yoowo iloma.

³¹O Umukasya ise naayihamba naayiyomisila khu makaambila koowo; ukhaandekha ise nawaambibwa kamaŋaanyu ta.

³²Ise inoondelela kamakaambila koowo ni kameelu makali, khulwekhuuba iwe umba ise khuteekela khuubalaayi.

³³O Umukasya, iwe n'undeekele ise sheesi kamakaambila koowo kamanyisa nio ise inyalise khuukaloondelela khukhwoolesa ikhumaliilisa.

³⁴O Umukasya n'umbe ise khuumanya, nio ise inyalise khuuloondelela kamakaambila koowo, naluundi ingaloondelele ilala ni kumwoyo mutweela.

³⁵N'unaangirire ise imenye buulamu bwase nga inoondelela kamakaambila koowo, khulwekhuuba kaandeerera ise kumwikhoyo.

³⁶N'ushuuse kumwoyo kwase kukobole isi indeekela yoowo, kulekhe khuweentsa busa bye buyiindifu ta.

³⁷Iwe ukhaandekha ise namalila kamaani kaase khu bye bubeeyi ta, ne n'uliinde buulamu bwase buloondelele kamakaambila koowo.

³⁸Ni wolelese sheesi iwe wasuubisa umwakaanisi woowo, nga shili isho sheesi iwe uwa abo babaakhwisaaya iwe.

³⁹N'undusekho bukhomo bweesi nibo baakhoma ise, khulwekhuuba kamakaambila koowo kali kamalayi.

⁴⁰Bona ise ingana naabi kamakaambila koowo; khulwe bukwalaafu bwoowo iwe n'uliinde buulamu bwase.

⁴¹O Umukasya, iwe n'untsokesanise ise khuukana khwoowo khukhuukhakama ta, n'ube umuwonesi wase, khuuloondekhana ni byeesi iwe wamweene waloma.

⁴²Shino shikile ise imbekho ni she khukhwilamo abo babaambiyila ise khulwekhuuba ise ndi ni kumwiyikino mu lomo yoowo.

⁴³N'unjeete ise inyalisatsake khuukanikha bya ŋali byonyene, khulwekhuuba kumwiyikino kwase kuli mu makaambila koowo.

⁴⁴Ise kane niloosele khuuloondelela kamakaambila koowo, biilo ni biilo.

⁴⁵Kane ise injeendele mu lukoosi, khulwekhuuba ise inoondelela kamakaambila koowo.

⁴⁶Ise singane shimaambise kamaŋaanyu khuukanikha khu makaambila koowo nga indi mu moni tsye bayiinga ta.

⁴⁷Khulwekhuuba ise inyoola kumwikhoyo mu makaambila koowo, keesi ise ingana naabi.

⁴⁸Ise ingana kamakaambila koowo, naluundi ingeesamo lukoosi, Ise niyika indeekela yoowo.

⁴⁹Shebulila byeesi iwe waalomela umwakaanisi woowo, khubirira mu byeene ibyo iwe waamba ise kumwikhoyo.

⁵⁰Ise ni naba mu mutaambo, shino nisho shishandeerera lukoosi nga naamanyile ndi sheesi iwe wasuubisa nisho shishiniinda ise.

⁵¹Ikhaba nga abo babaakharya Wele ta bambirisa ise buubi, ne ise siinyala naayeŋaana naarura khu makaambila koowo ta.

⁵²O Umukasya, nga naashebuliile indeekela yoowo isi iwe warawo khaalekho, ise indeerera lukoosi.

⁵³Ise lirima liikali limaamba, khulwe baboonaki babaakhaloondelela kamakaambila koowo ta.

⁵⁴Buli aandu oosi isi ise imenya, kamakaambila koowo kali niko kakantsisamo ise kamaani.

⁵⁵O Umukasya, ikhaba mu shilo ise ishebulila lisiina lyoowo, naluundi ise inondelela kamakaambila koowo.

⁵⁶Ilomo iye khuuloondelela kamakaambila koowo, niyo ili isaambo yase isi ise imenyamo buulamu bwase.

⁵⁷Umukasya ali niye sheesi ise nikoomba mu bulamu; ise naakhalilewo ilala khuuloondelela byeesi niye aloma.

⁵⁸Ise nakhwikoontselele iwe ni kumwoyo kwase kwoosi, n'umaambile ise shiisa, khuuloondekhana ni sheesi iwe waanomela ise.

⁵⁹Ise nemenielesile byeesi iwe ukana, ni nashiryo naakoboleyo khuuloondelela indeekela yoowo.

⁶⁰Ise sinekhwekhweesile ta, akhali naayubilekho, mu khuuloondelela kamakaambila koowo.

⁶¹Ikhaba nga kimireko kye baboonaki kyaantsibotokheleele ise, ne ise siinyala nebilila byeesi iwe uleekela ta.

⁶²Ise ninyukha mu shilo akari khu khuruuya iwe, khulwekhuuba indeekela yoowo ili ingwalaafu.

⁶³Ise ndi umusaale uwabo boosi babaakhwisaaya iwe, naluundi uwabo boosi babaloondelela kamakaambila koowo.

⁶⁴O Umukasya, shibala shoosi shaayitsula khuukana khwoowo khukhuukhakama ta; n'undeekele ise kamakaambila koowo.

⁶⁵O Umukasya iwe waambirisile ise buulayi, nga utsiila khu lomo yoowo.

⁶⁶N'umbe ise kamakhula kamalayi ke khuukhalawo she khuukhola ni ke khuumanya, khulwekhuuba ise ifukiilisa mu makaambila koowo.

⁶⁷Ise narura khu makaambila koowo, waakila iwe waamba ise shitaambiso, ne ari ise inoondelela ilomo yoowo.

⁶⁸Iwe uli umulayi, naluundi ukhola bibiindu biilayi, n'undeekele ise kamakaambila koowo.

⁶⁹Ikhaba nga abo babaakharya Wele ta baantsuntsumilisa ise mu bikhalimo ta, ne ise imaamba indeekela yoowo ni kumwoyo mutweela.

⁷⁰Babaandu bano bali ni kimirwe kimisilu, ne ise khulwase, kumwikhoyo kwase kuli mu makaambila koowo.

⁷¹Shaba shilayi ise khubira mu mutaambo, khulwekhuuba shaakila ise neyika indeekela yoowo.

⁷²Kamakaambila koowo keesi iwe waamba ise, kafuurira aleeyi naabi buyiindifu bwe mu shibala bwoosi.

⁷³Kamakhono koowo niko kakaamuumba ise naluundi kaantsikesa ise khuuba nga niindi, n'umbe ise khuumanya nio akile niyike kamakaambila koowo.

⁷⁴Abo babaakhwisaaya iwe kane bambone ise baryo bekhoye, khulwekhuuba ise kumwiyikino kwase kuli mu lomo yoowo.

⁷⁵O Umukasya ise naamanya ndi iwe ukhalawo kimisaango mu ŋali, naluundi iwe uli umutuufu khukhuumba ise shitaambiso.

⁷⁶Khayo khuukana khwoowo khuukali ukhwo khundeerere ise lukoosi, khuuloondekhana ni byeesi iwe wasuubisa umwakaanisi woowo.

⁷⁷Khali umambiile ise shiisa, undekha imba umulamu, khulwekhuuba kamakaambila koowo kali niko kumwikhoyo kwase.

⁷⁸Khali kamaŋaanyu kawaambile abo babaakhesaaya Wele ta, khulwekhuuba bantsiinisile ise busa akhali ilomo ta; ne kane ise nambaase khu makaambila koowo.

⁷⁹Khali abo babaakhwisaaya iwe beetsile luundi isi ise, nio banyalise khukhwiyika kamakaambila koowo.

⁸⁰Khayo ise inoondelele indeekela yoowo ni kumwoyo mutweela, nio akile indekhe khukhwoolisibwakho khuuswaala ta.

⁸¹Ise naliindilila buwonesi bubwaama isi iwe, ise ndi ni kumwiyikino mu lomo yoowo.

⁸²Ise naaluyile ni khuuliinda byeesi iwe waanomela, noola ni khukhwireeba indi, “Umukasya aliitsa liina khukhuumbonesa ise?”

⁸³Ikhaba nga ari ise ndi busa kuutsina kukwitsuule lisuusi, ne ise sinaalekhile khuuloondelela indeekela yoowo ta.

⁸⁴Umwakaanisi woowo kane ekhalilikhe khukhwoolisa liina? Iwe ulikhalila liina kumusaango abo babaangubyeenga ise?

⁸⁵Abo babaaloba khuukhwisaaya iwe bandekire ise kimireko, nga sibenaanayo khu makaambila koowo ta.

⁸⁶Kamakaambila koowo kaliwo biilo ni biilo, babaandu bano baangubyenga ise akhali ilomo yoosi ta, ikhuloomba iwe n'unjeete.

⁸⁷Ikhaba nga aambi barusewo buulamu bwase, ne ise noomisiile indeekela yoowo.

⁸⁸Nga khuukana khwoowo khuukali ni khuli, n'uliinde buulamu bwase, nio ise inyalise khuuloondelela kamakaambila keesi iwe warawo.

⁸⁹O Umukasya, ilomo yoowo buli busheele ili iyaŋali, naluundi ni mwikulu busheele shiliba shaŋali.

⁹⁰Bubwiyikinwa bwoowo buliwo mu buli kumuboolo; iwe waakhwiikha shibala shaayima akhali khuuyeŋaana ta.

⁹¹Khulwe khuukhalawo khwoowo, bibuumbe byoosi biloondelela sheesi iwe ulakila; khulwekhuuba byoosi bili bibyakaanisi isi iwe.

⁹²Ise indekha khunyoola kumwikhoyo mu makaambila koowo ta, khali nga ni naba mu mutaambo khali nafwa.

⁹³Ise siinyala nebilila indeekela yoowo ta, khulwekhuuba iwe waakiraambisile khuuliinda buulamu bwase.

⁹⁴N'umbonese, ise ndi uwoowo! Khulwekhuuba ise inondelela indeekela yoowo.

⁹⁵Baboonaki bantsibuulila ise bari bantsire; ne ise niyikina kamakaambila koowo.

⁹⁶Ise naamalile khubona nga bibiindu byoosi bilikho ni intsakamo, ne kamakaambila koowo kaliwo busheele, imbaakho intsakamo ta.

⁹⁷O Umukasya, ise nga naasiima kamakaambila koowo! Niko keesi ise nikhala nambaasakho buli busheele.

⁹⁸Kamakaambila koowo kakila ise naaba umukesi khuuminyisa baasiku baase, khulwekhuuba ise ingambaasakho busheele.

⁹⁹Ise indi ni kamakhula kakaaminyisakho ni baleekeli baase boosi, khulwekhuuba ise nambaasa naabi khu ndeekela yoowo.

¹⁰⁰Ise indi ni kamakhula khuuminyisakho abo babafuura ise kimiiko, khulwekhuuba ise inoondelela kamakaambila koowo.

¹⁰¹Ise sinayihaambilakho mu bikholwa bye bubwoonaki ta, nio inyalise khuuloondelela ilomo yoowo.

¹⁰²Ise sindekha kamakaambila koowo naanyukanyuka ta, khulwekhuuba iwe waayindeekela ise khuukaloondelela.

¹⁰³Kamakaambila koowo nga kali ke kumuŋawo! Kaanula ni khuuminyisakho bubuushi bwe intsushi.

¹⁰⁴Ise ifuna khuumanya mu khubirira mu ndeekela yoowo, nashiryo ise naabiyila buli kumukhoosi kwe bubeeyi kwoosi.

¹⁰⁵Ilomo yoowo niyo ili itaala, iyimulikhila ise busheele khu ntsila isi injeendelakho.

¹⁰⁶Ise naasuubisile Umukasya nga nitsuba ndi, kane ise inoondelelatsake indeekela yeewe ingwalaafu.

¹⁰⁷O Umukasya, ise kumutaambo kumukali kwaamaambile, n'ungobosemo kamaani, khuuloondekhana ni sheesi iwe wasuubisa.

¹⁰⁸O Umukasya, ni wakanile khuruuya khwase, nga nikhwo khukhuuli shiwaanwa shase, undeekele ise kamakaambila koowo.

¹⁰⁹Ikhaba nga busheele buulamu bwase buli mu bihangafu, ne ise siinyala nebilila kamakaambila koowo ta.

¹¹⁰Ikhaba nga baboonaki bandekire ise kimireko, ne shitweela busa ise singane naantsukhe indeekela yoowo ta.

¹¹¹Kamakaambila koowo kali she buusikha bwase biilo ni biilo, niko kali kumwikhoyo kwe kumwoyo kwase.

¹¹²Ise naakhaliilewo ilala khuuloondelela indeekela yoowo, khukhwoolisila ilala biilo ni biilo.

¹¹³Ise singana babaandu babekholisa busa ta, akhali ise ingana kamakaambila koowo.

¹¹⁴Iwe niye ingabo yase naluundi iwe niye uwuniinda ise, ise ndi ni kumwiyikino mu lomo yoowo.

¹¹⁵Inywe baboonaki ni muundurewo mutsye, nio ise inyalise khuuloondelela kamakaambila ka Wele wase isi ise nisaaya.

¹¹⁶Khuuloondekhana ni byeesi iwe wasuubisa, uri nio ise imbe umulamu, n'umbe ise buyeeti bwoowo, nio ise indekhe khuwaambibwa kamaŋaanyu mu mwiyikino kwase ta.

¹¹⁷N'uniinde ise khuuba umulamu, nio ise inyalise khufuna buwonesi, nio ise inyalise khukhwiisa lukoosi mu indeekela yoowo.

¹¹⁸Abo babaanyukanyuka baarura khu makaambila koowo, iwe s'ubakana ta; khulwekhuuba bali be tsimbomelo naluundi bali be bubeeyi.

¹¹⁹Abo babaali baboonaki mu shibala muno, iwe ubayila khuuba busa nga shishiindu shikhalimo kumukaso ta, ni nashiryo ise ingana kamakaambila koowo.

¹²⁰Ise inikina busa khulwe khukhurya iwe, naluundi ise niisa lukoosi musaambo isi iwe ukhalamo kimisaango.

¹²¹Ise ikhola bya ŋali naluundi byeesi iwe ukana, ukhaandekha mu makhono kaabo babaamiinikhilisa ise ta.

¹²²Iwe n'uniinde ise buulayi naluundi unjeete ise umwakaanisi woowo, ukhalekha abo babaakhakhwisaaya iwe baamiinikhilisa ise ta.

¹²³Tsimoni tsase tsyaluwiliile khuumoka nga tsiliinda buwonesi khukhwaama isi iwe, ni khuuliindilila ndi iwe wolelese bukwalaafu bweesi iwe waanomela ise.

¹²⁴N'ukholakane n'umwakaanisi woowo khuuloondekhana ni khuukana khwoowo khukhuuli khuukali, uryo undeekele ise kamakaambila koowo.

¹²⁵Ise ndi umwakaanisi woowo, n'unjeete ise imbe ni kamakhula, nio akile ise imanye indeekela yoowo.

¹²⁶O Umukasya, yino niyo imbuka iye khuukholawo shikholwa shishookesanisa, khulwekhuuba baafuniakile kamakaambila koowo.

¹²⁷Mu ŋali ise ingana kamakaambila koowo, khuuminyisakho ikhaba ni buyiindifu bwe angaaki.

¹²⁸Ni nashiryo ise inoondelela indeekela yoowo yoosi, ise singanakho bye bubeeyi ta.

¹²⁹Kamakaambila koowo kali kamalayi naabi, ni nashiryo kumwoyo kwase kukaloondelela.

¹³⁰Ilomo yoowo ireera buwaanga, naluundi ileekela babaandu ba busheele khuumanya.

¹³¹Ise ndi ni kameelu kamakali naabi, ke khukhwikoomba khuuloondelela kamakaambila koowo.

¹³²N'urekeerese likono lyase umaambile ise shiisa, nga musaambo niyo indweela isi ubirisamo abo babaakhwisaaya iwe.

¹³³N'unaangirire ise imenye khuuloondekhana ni sheesi iwe wasuubisa, nio ise inyalise khuuloondelela kamakaambila koowo.

¹³⁴N'umbonise ise khukhwaama isi abo babaamiinikhilisa ise, nio ise inyalise khuuloondelela indeekela yoowo.

¹³⁵N'umaambile ise shiisa, undeekele kamakaambila koowo.

¹³⁶Ise ndila kamasika kamakali, khulwe babaandu babaakhaloondelela kamakaambila koowo ta.

¹³⁷O Umukasya, iwe uli umukwalaafu, naluundi iwe ukhalawo kimisaango mu buulayi.

¹³⁸Iwe warawo indeekela yoowo ingwalaafu naluundi ili iya ngali.

¹³⁹Ise lirima liikali limaamba, khulwekhuuba baasiku baase sibenaanayo khu lomo yoowo ta.

¹⁴⁰Kamakaambila koowo keyikinikhikha, naluundi ise umwakaanisi woowo ingakana.

¹⁴¹Ikhaba nga ise baafwotsola naluundi baandekelesa, ise singene naantsukhe kamakaambila koowo ta.

¹⁴²Buukwalaafu bwoowo buli bwe biilo ni biilo, ni kamakaambila koowo kali ka ŋali.

¹⁴³Ikhaba nga ise ndi mu mutaambo naluundi indi ni khukhwiyembelela, ne kamakaambila koowo kaandeerera ise kumwikhoyo.

¹⁴⁴Indeekela yoowo ingwalaafu iliwo biilo ni biilo; n'undeekele ise nio inyalise khuuba umulamu.

¹⁴⁵O Umukasya, ise ikhukuukuula iwe ni kamaani kaase koosi, n'untsilemo; nio ise inyalise khuuloondelela kamakaambila koowo.

¹⁴⁶Ise ikhukuukuula iwe, n'umbonise; nio ise inyalise khuuloondelela kamakaambila koowo.

¹⁴⁷Ise ninyukha mu bulili antsye mamilimili naakhukuukuula iwe nga ingana buyeeti, ise niyikina ilomo yoowo.

¹⁴⁸Ise ingona meeso, nga nambaasa khu byeesi iwe wasuubisa.

¹⁴⁹O Umukasya, khulwe khuukana khwoowo khukhuukhakama ta, n'uwuliilise likono lyase; nga niili isaambo yoowo, n'uliinde buulamu bwase.

¹⁵⁰Abo babaangubyeenga ise nga bali ni bitsilililwa bye bubwoonaki balikho beetsilila aambi naabi khulwekhuuba sibawaamba kamakaambila koowo ta.

¹⁵¹Ne Umukasya iwe uli aambi ni nase, naluundi kamakaambila koowo koosi kali ka ŋali.

¹⁵²Khukhwaama khaale khakheene, ise naamanya khukhwaama mu makaambila koowo indi, iwe wakarawo uri kamale biilo ni biilo.

¹⁵³Iwe n'ubone kumutaambo kweesi ise ndimo, undusemo; khulwekhuuba ise sinaayibilila kamakaambila koowo ta.

¹⁵⁴Iwe n'umbotsele ise kumusaango kuno umbonese; n'uwonese buulamu bwase khuuloondekhana ni sheesi iwe wasuubisa.

¹⁵⁵Wele s'ali uwonesa babaandu baboonaki ta, khulwekhuuba nibo bayantsukha kamakaambila keewe.

¹⁵⁶O Umukasya, iwe nga uli ni shiisa shikali! Nga ni ili isaambo yoowo, n'uliinde buulamu bwase.

¹⁵⁷Baasiku baase ni naabo babaangubyeenga ise bali baakali, ne ise sinaayikaanatsakakho kamakaambila koowo ta.

¹⁵⁸Ise nga naaboone abo babaakhakhwisaaya iwe ta, bamaambisa lirima, khulwekhuuba sibaloondelela kamakaambila koowo ta.

¹⁵⁹N'ubone isaambo isi ise inganamwo kamakaambila koowo! O Umukasya, n'umbonese ise buulamu bwase khulwe khuukana khwoowo khukhuukhakama ta.

¹⁶⁰Kamakaambila koowo kaayitsula bwa ŋali bwonyene; na buli litweela khu makaambila koowo litsya khubawo biilo ni biilo.

¹⁶¹Abo babaali bawuli baangubyenga ise akhali ilomo yoosi ta, ne kumwoyo kwase kwiisa shiriifwa shikali mu lomo yoowo.

¹⁶²Ise nikhoya khulwe kamakaambila koowo, nga umuundu unyoolile bye buyiindifu bukali ni ekhoya.

¹⁶³Ise singana bye bubeeyi ta, ne akhali ingana kamakaambila koowo.

¹⁶⁴Buli shifukhu ise ikhuruuya iwe kimiluundi kimikali naabi, khulwe kamakaambila koowo kamakhosefu.

¹⁶⁵Abo babaloondelela kamakaambila koowo, bamenya mu lukoosi lubiriirifu; mbaawo bukosi bubunyala bwaabakwakho ta.

¹⁶⁶O Umukasya, ise niyikina buwonesi bubwaama isi iwe; ise inoondelela kamakaambila koowo.

¹⁶⁷Ise inoondelela kamakaambila koowo, naluundi ise ingakana naabi.

¹⁶⁸Ise inondelela kamakaambila koowo ni byeesi iwe wasuubisa, khulwekhuuba iwe wamanya isaambo yoosi isi ise nibirisamo.

¹⁶⁹O Umukasya, khali khuuloomba khwase khwoolile isi iwe uli; n'undeekele ise khuuloondekhana ni lomo yoowo.

¹⁷⁰Khayo khuuloomba khwase khwoole isi iwe uli; n'umbonese ise khuuloondekhana ni kamakaambila koowo.

¹⁷¹Khulwekhuuba iwe undeekela ise kamakaambila koowo, kane ise ikhuruuye iwe.

¹⁷²Kane ise niimbe kamakaambila koowo nga uwiimba kumweenya, khulwekhuuba kamakaambila koowo koosi kali ka ŋali.

¹⁷³N'ube mwirekefu khukhuunjeeta ise, khulwekhuuba ise naakhalilewo khuuloondelela kamakaambila koowo.

¹⁷⁴O Umukasya, buulamu bwase bwaaliindiliile buwonesi khukhwaama isi iwe; naluundi kumwikhoyo kwase kuli mu khuuloondelela kamakaambila koowo.

¹⁷⁵N'umbe ise buulamu buulayi, nio ikhuruuye iwe, naluundi khayo kamakaambila koowo kabe niko kanjeeta ise.

¹⁷⁶N'umeentse ise ungobose, khulwekhuuba indi busa nga lisheese lilikoraanile. N'ungobose khulwekhuuba ise sinaayibilila kamakaambila koowo ta.