Read lumasaaba Tsizabuli 130 Bible Online

Tsizabuli 130 - lumasaaba bible

Tsizabuli 130

¹Khulwe ingunyi ingali isi ise ndimo, ise nakhwilootsela iwe Mukasya!

²O Umukasya, rekeeresa kamalilo kaase! Reka khukhuru khwoowo urekeerese likono lye khuuloomba khwase.

³O Umukasya, iwe uba nga ubala naluundi washebulila bibyoonako byeefwe, khali naanu uwona iwe khuumukhalila kumusaango?

⁴Ne akhali indi iwe busheele uli mwirekefu khukhwiyakhila, ni khulwe shisheene isho, ifwe khukhwisaaya iwe.

⁵Bulamu bwase buliindiilila Umukasya nga buli ni kameelu kamakali, nga ise ndi ni kumwiyikino mu lomo yeewe.

⁶Khulwe kameelu ise nikhala naakhuliindiilila iwe, khuuminyisakho umusilikhale uwibuula mu shilo, ni ekhala nga waaliindile busa ari kumutishinyi kwoola liina.

⁷Inywe ba Isiraeli ni mure khukhwiyikina khweenywe mu Mukasya, khulwekhuuba niye ali ni shiisa shikali, naluundi niye ali ni bunyala bwe khuubawonesa.

⁸Naluundi Umukasya akhaawonese ba Isiraeli khukhwaama mu byoonako byaabwe byoosi.