Read lumasaaba Tsizabuli 132 Bible Online

Tsizabuli 132 - lumasaaba bible

Tsizabuli 132

¹O Umukasya, iwe n'ushebulile bihangafu byeesi Dawudi aabiramo, umuwaambile shiisa.

²O Umukasya shebulila isho sheesi Dawudi aasuubisa, nga ni etsubila mu moni tsya Wele wa Isiraeli uuli ni kamaani ari,

³“Ise singene intsye ingo, namwe ningile mu bulili bwase khuukona liilo ta;

⁴Singene intsye khuuwola namwe khuukona ta,

⁵khukhwoolisa nga naanyoolile shifwo she khuubiikhamo Isanduuku iye Indakaano y'Omukasya, niye uuli Wele wa Yakobo.”

⁶Nga khuli mu Beselehemu khwawulila biibiwaamba khu sanduuku iye Indakaano, ni khwatsya, khwakinyoola nga ili aambi ni Yaali.

⁷Ifwe khwaloma khuri, “Khakhutsye khwingile mu ntsu ya Wele, khakhwisaayile aasi e bikele bye shitsoloŋo she buwuli bweewe.”

⁸O Umukasya, yinyukha wiitse wingile mu Lisaayilo lyoowo Likhulu, umenye mubweene umwo, iwe wamweene atweela ni Isanduuku iye Indakaano, nga niyo khaabonelo khe bunyala bwoowo.

⁹Khali basaayi boowo bakholile byeesi iwe ukana nga shikwaaro she bukwalaafu, khayo babaandu babaloondelela byeesi iwe uloma besutake khulwe kumwikhoyo.

¹⁰O Umukasya, khulwe shisuubiso sheesi iwe wakholela umwakaanisi woowo Dawudi; ari iwe ukhaantsukha umubiite woowo ta.

¹¹Umukasya etsuba nga akholela Dawudi shisuubiso, nga aloma ari, s'alimwaantsukha ta, nga shisuubiso ni shiloma shiri; “Ise Umukasya, indibukula mutweela khu be munda yoowo, ekele niye umuwuli, nga ali umusikha woowo.

¹²Noola abo boosi babaali basikha boowo bawaamba kamakaambila kaase nga ise ni imbaleekela, akhaba babetsukhulu beewe baliba bayiinga biilo ni biilo.”

¹³Khulwekhuuba Umukasya waamalile khuurobora Sayuuni, nga umweene ekoomba ari nisho shibe muungo mweewe mweesi amenya.

¹⁴Umukasya aloma ari, “Shino shili shiifwo shase she khuumenyamo biilo ni biilo; kane ise imenye ano, khulwekhuuba samweene naakanile indyo.

¹⁵Ise ikhaawe Sayuuni tsikhabi nio inyalise khuufuna bibiindu byoosi biilayi; abo babaali bataambi ise indi bafuumulila biilyo biilayi.

¹⁶Basaayi be mu Sayuuni ise indibawa buwonesi; ni babaandu baase babaamenyamo baliisutaka khulwe kumwikhoyo.

¹⁷Ise ndikalusa mutweela khu be munda iya Dawudi, khuuba umuyiinga uwe kamaani; umubiite wase ise naamala khaale khumuŋoonaŋoonela buulamu bubukhawawo ta, buli busa nga itaala ikhasima ta.

¹⁸Baasiku beewe boosi ise ndibaminiangula, ne lihabi lye khu murwe kweewe, lilirama nga limulikhamulikha.”