Read lumasaaba Tsizabuli 135 Bible Online

Tsizabuli 135 - lumasaaba bible

Tsizabuli 135

¹Ruuya Umukasya! Ruuya lisiina ly'Omukasya, inywe babaali babaakaanisi b'Omukasya, ni mumuruuye!

²Inywe babaali babaakaanisi mu ntsu y'Omukasya, inywe mumuuli mu Liisaayilo Liikhulu ly'Omukasya, ni mumuruuye.

³Ni muruuye Umukasya, khulwekhuuba Umukasya ali umulayi naabi; ni mwiimbe kimyeenya nga muruuya Umukasya, khulwekhuuba shili shilayi khuumuruuya.

⁴Khulwekhuuba Umukasya umweene waamala khaale khukhwiroborera babaandu be inda ya Yakobo, waamala khuurobora babaandu ba Isiraeli khuuba shishiindu shisheewe umweene.

⁵Khulwekhuuba ise naamanya ndi Umukasya ali umukhulu naabi, naluundi ise naamanya indi Umukasya ali uwe angaaki khuuminyisa ba wele boosi.

⁶Mwikulu ni khu shibala, ikhaba aasi abweene mu nyaantsa, Umukasya akhola shoosi sheesi akana.

⁷Umukasya niye ureera kamafuumbi nga akaamisa aleeyi abweene, niye ureera luheni nga ifula ilikho ikhupa, naluundi niye ureera ikhuungu nga akyaamisa isi umweene amanyile.

⁸Mu Misiri, Umukasya niye uweera babaana baabwe baakiboole, ni bikiboole bye bibyaayo byaabwe.

⁹Ba Misiri, nga mwabeene mweboonelekho, Umukasya aakhola bye kamakaanga ni biibiyaangisa, nga abikhola khulwe khuutsiinisa umuyiinga uwa Misiri ni naabo babaaba mu buwuli ni naye.

¹⁰Umukasya onakisa kamanaambo kamakali naluundi weera bayiinga baakali,

¹¹nga nimwo mumuuli Sihoni, umuyiinga uwe babaandu ba Amori, weera ni Ogo, umuyiinga we Bashani, wawula ni bayiinga boosi babaaba mu Kanani.

¹²Umukasya waabukula liloba lyaabwe waalikabila babaandu beewe ba Isiraeli nga kumukabo kwaabwe.

¹³Umukasya, lubuyi lwoowo silulyakama ta; kimiboolo ni kimiboolo kye babaandu kili khuukanikha khwiiwe ni byeesi ukhola.

¹⁴Umukasya aliitseeta babaandu beewe; naluundi awaambile shiisa abo babaali babaakaanisi beewe.

¹⁵Ba wele beesi kamanaambo kakaandi kesaaya bali busa bibiindu byeesi babuumba ni kamakhono kaabwe, bali busa ifeeza ni zaabu.

¹⁶Ikhaba nga babarakho kiminwa, ne sibanyala khuukanikha ta, balikho tsimoni ne sibanyala khubona ta.

¹⁷Ikhaba nga balikho kamaru ne sibawulila ta, naluundi sibalimo buulamu bwoosi ta.

¹⁸Abo boosi babaabuumba ba wele abo, nabo balishuukha bataambemo buulamu nga ba wele abo.

¹⁹Inywe ba Isiraeli mweesi ni muruuye Umukasya, Inywe basaayi be inda iya Aroni, ni muruuye Umukasya!

²⁰Inywe babaakaanisi be mu Liisaayilo Liikhulu, be nda iya Levi, ni muruuye Umukasya. Inywe mweesi babesaaya Umukasya, ni muruuye Umukasya.

²¹Sayuuni yoosi khayo iruuye Umukasya, uli ingo weewe, mu Yerusalemu.