Read lumasaaba Tsizabuli 137 Bible Online

Tsizabuli 137 - lumasaaba bible

Tsizabuli 137

¹Ifwe ni khwaba khu ndulo khwe tsintsitsi tsye mu shibala Babulooni, khwekhala aasi, ne ni kwashebulila Yerusalemu, kumutaambo kwakhuwaamba khwaalila kamasika.

²Khwasuunga biyilili byeefwe khu bisaala, khwekaana khuubiraambisa.

³Khulwekhuuba abe abo babaakhuwaambile khuukhuyila nga baabowe, balikho bakhutsekhelela ifwe nga baloma bari, “Ni mukhwimbilekho kimyeenya kya Sayuuni, mukhusangaasemo!”

⁴Ifwe khunyala khuryeena khweemba kimyeenya kikiruuya Umukasya, nga khuli khu liloba lilikhali lilyeefwe ta?

⁵Yerusalemu, abe noola ise namala naakhwibilila iwe, khayo kumukhono kwase kumulayi kukataale.

⁶Noola ise nebilila Yerusalemu, khayo lulimi lwase lwiwaambe mukhanwa mu ngaaki, indekhe khunyalisa khwiimba luundi ta.

⁷Mukasya weefwe, iwe n'uwe babaandu be mu Edomu shitaambiso! Khulwekhuuba khu shifukhu khweesi baasiku bebwakalilamo Yerusalemu, nibo baayokesela angaaki nga baloma bari, “Malawo shiriimba isho, shimalewo! Ni mu shisisakulile ilala khukhwoola khu musiingi kwasho!”

⁸Inywe babaandu be mu Babulooni mutsya khuhela, mutsya khuhela! Uyo yeesi ukane abawe inywe shitaambiso khulweebyo byeesi mwakhukhola ifwe, ise imuloombela ikhabi khukhwaama isi Umukasya.

⁹Khali uyo yeesi uwaamba babaana beenywe waabakhupa khu lwaanda, Umukasya amuweele ikhabi.