Read lumasaaba Tsizabuli 139 Bible Online

Tsizabuli 139 - lumasaaba bible

Tsizabuli 139

¹Umukasya, iwe waayisheenga mu mwoyo kwase, waamanya ibyo byoosi bibiimaamba khusiise.

²Iwe umanya oba ise nekhaale aasi, namwe oba neemikhile khu ngaaki. Iwe uli mwikulu ne ufuumbula bibyambaaso byase.

³Iwe waamanya oba ise indi mu lukyeendo namwe naakonile aasi, naluundi iwe waamanya intsibirisa yase.

⁴O Umukasya, ikhaaba nga ise ishiili khuloma ni ilomo ta, iwe uba waakimanyile khaale.

⁵Iwe uraambisa kamaani koowo waantsibotokhelela khu buli luwaande.

⁶Kamakhula nga kakoowo ako kali ke angaaki naabi; kali ke angaaki naabi ise siinyala naakoolakho ta.

⁷Ne waheena isi ise inyala naatsya, isi iwe ukhali ta? Namwe iliwo isi ise inyala naatsya nio naakhwibisa khusi iwe?

⁸Ise ni inoma ndi iniine mwikulu mu ngaaki, iyo iwe uliyo! Abe naakhalima aasi neekha imakoombe, akhaba iyo iwe uliyo.

⁹Abe naakhapaamburukha naakhalisa inyaantsa, naatsya ibwaamanyaanga namwe ibukwanyaanga,

¹⁰akhaba ibweene iyo, kamaani koowo kaliyo, niko kakanaangirira naluundi niko kakaaniinda ise.

¹¹Namwe abe ni noma ndi, “Khayo niibise mu shiilima, akhali buwaanga bwoosi ta,”

¹²ikhaba shishiilima khusiiwe seshili shishiilima ta. Shiilo shaakhoselela busa nga kumuusi; isi iwe shishiilima ni buwaanga bili shitweela busa.

¹³Khulwekhuuba iwe niye uwabuumba buli shisiintsa she kumubili kwase, iwe niye uwamuumba ise waanda mu nda ya maayi wase.

¹⁴Ise ikhuruuya iwe naabi khulwekhuuba isaambo isi iwe waamumbamo ise ili iye angaaki naluundi yiyaangisa. Bikholwa byoowo bili bye angaaki naabi! Iwe waayiimanya ise buulayi naabi.

¹⁵Mbaawo shishimaamba khusiise sheesi iwe ukhamanya ta. Ise nabuumbibwila mu shimoonyo, nareerebwa atweela mu nda ya maayi wase, ikhaba nga ise naba ntsowa mu shimoonyo, ne iwe waamanya uli indiwo.

¹⁶Ne iwe waambona ise nga ishiili na khubuumbibwa ta. Ikhaba nga ise ishiili khusaalikha ta, ne biifukhu byeesi abe ise ntsya khumenya khu shibala, abe ikhaba nga bishiili khurakikha ta, byaba byaaronebwa mu shitabo shoowo.

¹⁷O Wele, bibyambaaso byoowo nga bili bye angaaki! Bibyambaaso byoowo nga bili biikali naabi!

¹⁸Ise ni khakakho khuubala bibyambaaso byoowo, nibyo bifuurakho kumuyeekhe kukuuli khu ndulo khwe nyaantsa buukali! O Wele, abe ise naakhakona naasisimukha mu lilo, ise inyoola nga iwe ushiili ni nase.

¹⁹Ise nikoomba ndi khali iwe wirire baboonaki boosi, naluundi utimisa babaandu baboonaki khuurura isi ise ndi, batsye.

²⁰Babaandu babaakhuminyaalila iwe akhali ilomo ta; babeniinisa angaaki khulwe bibyoonako byaabwe.

²¹O Umukasya, ise naabiyila abo babaakhubiyila iwe. Naluundi ise singana abo babaakhuminyaalila iwe ta.

²²Ise simbakanakho nakhafwiiti khari ta; abo bali baasiku isi ise.

²³O Wele, iwe yimenielesa kumwoyo kwase ubone! Entselesa umanye ibyo byeesi ise ndikho nambaasa.

²⁴Ni nawe kane ubone oba iliwo she bubwoonaki shoosi musiise, ne khali unaangiriire umbila ise mu mukhoosi kwe biilo ni biilo.