Read lumasaaba Tsizabuli 140 Bible Online

Tsizabuli 140 - lumasaaba bible

Tsizabuli 140

¹N'umbonise ise O Umukasya, khukhwaama mu makhono ke babaandu baboonaki; n'umbonise ise khukhwaama khu baandu be bisaayumba.

²Baboonaki mu myoyo kyaabwe bakhola tsinengekharengekha tsye bibyoonako, naluundi busheele bakana naabi khurakikhawo busoolo.

³Tsilomo tsyeesi nibo baloma, tsili tsisongofu, tsili busa tsitsoonakisa nga butsiba bwe ndemu.

⁴O Umukasya, iwe n'ube ingabo yase ukhiinge ise khukhwaama isi baboonaki; n'uwuniinde ise buulayi khulwekhuuba be bituluungu barawo kumureko bari ise ingwemo.

⁵Babaandu babeniinisa angaaki abo, baabisile kumureko khukhuumaambilisa ise, bamwaatile ni kimikosi ni butiimba khu ntsila yase baarekire bari bamaambilise.

⁶Ne ise nalomela Umukasya indi, “Iwe uli niye Wele wase; n'urekeerese khuulila khwase!”

⁷O Mukasya, iwe niye kamaani kaase n'umbonese! Iwe niye ingabo yase mu buli busoolo.

⁸O Umukasya, ukhafukiilisa byeesi baboonaki abo bakana khuukhola byaabiramo ta, khulwekhuuba isho shikila beeloosela busa ni khuurengekharengekha bye bubwoonaki.

⁹Nibo baantsibotookheleele ise, ne iwe n'ubakhole babeene bakwe mu bihangafu bye bubeeyi bwaabwe.

¹⁰Khali ubalakasilekho bunoro buboosha! Khali ubamwaatile mu kulowo kuuleeyi kukweene, kweesi bakhanyala baaruramo ta.

¹¹Ukhalekha baboonaki abo khuumenya khu shibala ta, khayo bihangafu bikwe khu baandu be bisayuumba abo mu khaangu naabi!

¹²O Umukasya, ise naamanya nga iwe utseeta abo babaali mu mutaambo; naluundi iwe usoolanila umutaambi khuunyoola sheesi akana.

¹³Ilala, bakhosefu bakhaaruuye lisiina lyoowo, bakhaamenye ni nawe isi iwe umenya.