Read lumasaaba Tsizabuli 143 Bible Online

Tsizabuli 143 - lumasaaba bible

Tsizabuli 143

¹O Umukasya, n'urekeerese khuuloomba khwase, n'uwuliilise nga ise ni nilootsa. Khulwe shiisa shoowo ni bukwalaafu bwoowo, iwe n'untsilemo.

²Ise ndi umwakaanisi woowo, ukhaambotsisa ise kumusaango ta, khulwekhuuba mbaawo umuundu yeesi uuli umukhosefu mu moni tsyoowo ta.

³Khulwekhuuba umusiku waantsimbiyisile ise; waakhupile ise aasi waminiaanguule, wamwaatile ise mu shiilima, ise nafwaana busa nga uwafwa naatsya i makoombe.

⁴Ni nashiryo, ise kamaani kambwetsekheleele, ni kumwoyo kwase kuli kumwiyembelefu naabi.

⁵Ise ishebulila byeesi iwe wamala khuukhola amataayi, ise nambaasa naabi khu bikholwa byoowo, naluundi ise nikhoyela ibyo byeesi iwe ukhola.

⁶Ise isuta kamakhono kaase angaaki isi iwe uli, nga inoomba, khulwekhuuba buulamu bwase bukhuliindilila iwe, buli busa nga kumubiimbi ni kuliindiilila ifula.

⁷O Umukasya, yuubakho untsilemo ise khuuloomba khwase. Ise naaweelemo kamaani! Iwe ukhaantsibisakho waandekha ise naaba busa nga abo babaali imakoombe ta.

⁸Buli busheele iwe n'untsokesanise ise khuukana khwoowo, khulwekhuuba ise ikhwiyikina iwe. Iwe n'unaangirire ise mu byeesi ndi khuukhola, khulwekhuuba ise neetsile isi iwe uli nga inoomba.

⁹O Umukasya, n'unjeete ise khukhwaama khu baasiku baase. Ise nelukhile khukhwiibisa muusiiwe.

¹⁰Iwe uli Wele wase, ni nashiryo n'undeekele ise sheesi iwe ukana ise ikhole. Naluundi khayo Umwoyo woowo umulayi anaangirire ise antsolise mu khwibirisa khwa ŋali.

¹¹Khulwe buulayi bwe lisiina lyoowo, n'uwonese buulamu bwase. Khulwe bukwalaafu bwoowo, n'unduse ise mu bihangafu bino.

¹²Khulwe khuukana khwoowo khuukali, ni woonakise baasiku baase ubamalewo, beere boosi bawewo, khulwekhuuba ise ndi umwakaanisi woowo.