Read lumasaaba Tsizabuli 144 Bible Online

Tsizabuli 144 - lumasaaba bible

Tsizabuli 144

¹O Umukasya, ise ikhuruuya iwe, uli niye uwuntseeta ise nga lulwaanda, iwe niye uwundeekela ise isaambo indaayi iye khuusoolanamo.

²Iwe niye lulwaanda naluundi liitikiiyi lyeesi ise niibisamo, iwe niye ingabo yase isi ise nitseetela, iwe niye uwuntsikesile ise umuwuli uwe babaandu beesi ise inaangirira.

³O Mukasya, ne khuusiwe umuundu naye nisho shiina? Shiina kila iwe umwinaanakho?

⁴Umuundu ali busa nga kumuukha kweesi bahela, ni buulamu bweewe buwawo busa maangu nga shishiniini ni shiwawo.

⁵O Umukasya, n'ubayuule likulu wiitse aasi! Tiila khu ngiingi ukile tsituukhe lisuusi.

⁶Raambisa luheni lwoowo lube nga buyiingo, nio unyalise khuusalanisa baasiku baase, ubatimise batsye.

⁷Ni wiikhe aasi khukhwaama angaaki mwikulu, umbonese ise. Imbonese ise khukhwaama khu baasiku babaali ni kamaani abo, babaama mu shibala she babaandu babaakhamanyikhana ta;

⁸abo babaakhanyala bakanikha bituufu ta, naluundi babeyikina bye bubeeyi byonyene.

⁹Wele wase, kane ise ikhwiimbile iwe kumweenya kumushaakha, ise kane ikhuruuye iwe nga ikhuupila lituungu.

¹⁰Iwe niye uwa bayiinga kamaani nio waakila bafuura mu busoolo, naluundi iwe wawonesa umwakaanisi woowo Dawudi.

¹¹N'untsilukhise ise khukhwaama isi babaandu babaakhamanyikhaane abo ta, umbonise ise khukhwaama mu maani kaabwe, abo babaakanikha bye bubeeyi byonyene, naluundi babeyikina bye bubeeyi.

¹²Ifwe khuloomba khuri khali basooleli beefwe batsowele baba busa nga kimisaala kye kamaani; naluundi khuri khali bakhaana beefwe baamiliwu nga bisiindi bibiili mu lubili lw'omuyiinga.

¹³Khali birara byeefwe bitsuulemo bye likesa lya buli shikuuka; khali kamasheese keefwe kasaalane kaba kamakali.

¹⁴Khali buli ikhaafu isaalile imoosi! Ukhalekha shiriimba sheefwe baashiwaamba ta, namwe ifwe khwaayilibwa nga baabowe ta. Ikhabawo kumutaambo mu shiriimba sheefwe ta.

¹⁵Bali ni tsikhabi abo babaanyoola ikhabi nga yino! Bali ni tsikhabi abo babesaaya Umukasya Wele!