Read lumasaaba Tsizabuli 145 Bible Online

Tsizabuli 145 - lumasaaba bible

Tsizabuli 145

¹Iwe Wele wase naluundi uli Umuyiinga wase, kane ise ikhuruuye iwe. Lisiina lyoowo kane ise ndiisemo lukoosi, biilo ni biilo.

²Buli shifukhu ise ikhuruuya iwe, naluundi niisamo lisiina lyoowo shiriifwa.

³O Umukasya, iwe uli umulayi naabi, naluundi shaakhiile bakhuruuye, khulwekhuuba iwe uli iwe angaaki naabi khuuminyisa bibiindu byoosi.

⁴Buli kumuboolo kane kuboolele kukuundi bikholwa byoowo bye kamaani.

⁵Kane ise nambaasatsake naabi khu bikholwa byoowo bye kamaani ni bye kamakaanga byoowo.

⁶Buli muundu kane akanikhe khu bikholwa byoowo bibiriisa, naluundi kane ise imboolele kamanaambo nga iwe n'uli uwe angaaki.

⁷Kane beembe kimyeenya naluundi bakuukuule isi babaandu babaandi bibiwaamba khu shisa shoowo she angaaki ni bukhosefu bwoowo.

⁸Umukasya ali uwe shiisa naluundi eyakhila bibyoonako, ali umwikhalilikhi naluundi khuukana khweewe sikhwakama ta.

⁹Umukasya akana buli muundu, naluundi awaambila shiisa ibyo byoosi byeesi niye aabuumba.

¹⁰Bibuumbe byoowo byoosi O Umukasya, kane bikhusiime iwe, ni babaakhwisaaya iwe boosi kane bakhusiime iwe!

¹¹Boosi kane bakanikhe khu shiriifwa shishiili mu buyiinga bwoowo, ni khu bunyala bwoowo.

¹²Nashiryo buli muundu kane amanye bibiindu bye kamaani byeesi iwe ukhola, ni shiriifwa shishiili mu buyiinga bwoowo.

¹³Buyiinga bwoowo sibuliwawo ta, naluundi iwe uli umuwuli uwe kimiboolo ni kimiboolo. Umukasya ali umwiilama mu byeesi niye aloma, naluundi olelesa bikholwa byeewe.

¹⁴Abo babetuya baakwa aasi, Umukasya abenyusa, ni naabo babaweelemo kamaani, abeesamo kamaani.

¹⁵Buli shibuumbe khu shibala shikhwiyikina iwe, naluundi nga imbuka yoolile, buli shitweela ushiwa she khuulya.

¹⁶Uraambisa kumukhono kwoowo khuubikabila, waakila buli shitweela shaaba nga shekurire.

¹⁷Umukasya akhola bya ŋali mu buli shiindu, naluundi ali uwe shiisa mu buli byeesi akhola.

¹⁸Umukasya atimiilila abo babaamuloomba, abo babaamuloomba ni khukhwiyikina.

¹⁹Abo babaamwisaaya abawa buli sheesi bekoomba, abawa byeesi baloomba naluundi waabawonesa, nga baamuloombile buyeeti.

²⁰Umukasya enaanayo khuubo boosi babaamukana, ne baboonaki boosi akhaabehese bawewo.

²¹Ise kane nganikhe nga mbuyila Umukasya, khayo buli muundu esaaye lisiina ly'Omukasya, biilo ni biilo.