Read lumasaaba Tsizabuli 147 Bible Online

Tsizabuli 147 - lumasaaba bible

Tsizabuli 147

¹Ruuya Umukasya, Shili shilayi khukhwiimba kimyeenya nga khuruuya Wele; ali uwe shiisa, naluundi shaakha khumuruuye.

²Umukasya niye ombekha Yerusalemu buyaakha, naluundi waakobosa babaandu ba Isiraeli ingo luundi.

³Niye eesa kamaani mu myoyo kyeefwe, naluundi waasilikha kamakoontso keefwe.

⁴Niye ukhalawo buukali bwe tsinieniesi mu ngaaki, naluundi niye utsiwa tsyoositsana kamasiina kaatsyo.

⁵Umukasya weefwe ali uwe kamaani ni bunyala bukali. Niye waamanya buli shiindu.

⁶Umukasya ayeeta abo babaali bataambi, ne abo babaali baboonaki abakhupa aasi.

⁷Yikhoya luukali mwiimbile Umukasya nga mumusiima, khupa biyilili nga mumwimbila kimyeenya.

⁸Niye uwitsusa kamafuumbi mu ngaaki, naluundi niye ukila ifula yaakhupa khu shibala, nio waakila bunyaasi bwaatsowa khu bikiingi.

⁹Niye uuwa bisolo biilyo byeesi bilya, akhaba binywiinywi bye mwirome niye ubiwa she khuulya.

¹⁰Umukasya seshimusangaasa oba umuundu ali ni tsiŋwaaŋwa tsye kamaani, namwe oba umuundu ali ni liiye lye kamaani ta;

¹¹ne shishisangaasa Umukasya iba abo babaamwisaaya, abo babaali ni khukhwiyikina mu khukana khweewe khukhuukhawawo ta.

¹²Babaandu be mu Yerusalemu, ni muruuye Umukasya! Inywe babaandu be mu Sayuuni, ni muruuye Wele weenywe.

¹³Niye ukila buli shilibwa she shiriimba sheenywe shaaba she kamaani; naluundi niye uwa babaandu beenywe tsikhabi.

¹⁴Wele niye utseeta buli lulwaakha lweenywe, nio waakila inywe mwaamenya mu lukoosi; naluundi niye ubawa inywe iŋaano ifuura buulayi.

¹⁵Wele nga waarusile likaambila lyeewe, shibala shoosi shililoondelela.

¹⁶Niye akila kamararara kaakwa ketsula khu shibala, kaashibimbilila nga libulaangiti; naluundi waasalanisa buunyifu khu shibala.

¹⁷Umukasya asiindikha kamararara khu shibala keekha busa nga bubaale bufwiiti. Naanu unyala wekhaliilikha buunyifu ubwo?

¹⁸Umukasya alakila busa, kamararara kaayengukha, naluundi uli imbewo iwuutsa, kameetsi kaarakikha khukhwiikha.

¹⁹Umukasya kamakaambila keewe ni khuuleekela khweewe abiwa lisaaye lya Yakobo, nilyo linaambo lya Isiraeli.

²⁰Mbaawo linaambo liliindi lyeesi Umukasya awa kamakaambila keewe ta. Babaaramile sibaamanya kamakaambila keewe ta. Ruuya Umukasya.