Read lumasaaba Tsizabuli 148 Bible Online

Tsizabuli 148 - lumasaaba bible

Tsizabuli 148

¹Ruuya Umukasya! Ruuya Umukasya inywe babaali mwikulu! Ni nanywe babaali angaaki ni muruuye Umukasya.

²Inywe bamalayika beewe mweesi, ni mumuruuye! Inywe bibuumbe bye mwikulu mweesi, ni mumuruuye!

³Inyaanga ni kumweesi, ni muruuye Umukasya, inywe tsinieniesi mweesi, ni muruuye Umukasya.

⁴Likulu, ruuya Umukasya, ni kameetsi kakaali angaaki we likulu, ruuya Umukasya.

⁵Khayo bibiindu byoosi biruuye Umukasya! Khulwekhuuba niye uwarusa likaambila nio waakila byabuumbibwa.

⁶Niye aabibuumba ari bimenyewo biilo ni biilo; naluundi mbaawo khu byeesi niye aabuumba, shishinyala shashuukhakho ta.

⁷Bibuumbe bibimenya khu shibala byoosi, ni muruuye Umukasya, ikhaba bisolo bye mu meetsi mweesi, ruuya Umukasya.

⁸Kumulilo, kamararara ni bunyifu, ikhaba ikhuungu iwuutsa ni kamaani, ruuya Umukasya.

⁹Tsingoongo tsyoosi ni bikiingi byoosi, bisaala byeesi babutakho bye khuulya ni kimisaala kye kamaani, ruuya Umukasya.

¹⁰Tsisolo tse mwiirome ni bibyaayo bye aango mweesi, bisolo biibikhuruurira aasi ni n'ebyo biibipamburukha, ruuya Umukasya.

¹¹Bayiinga ni babaandu be khu shibala mweesi, baaraangilisi ni baawuli mweesi, ruuya Umukasya.

¹²Inywe basaani ni bakhasi mweesi, baahele ni babahangaale mu miiko, yiitsa muruuye Umukasya.

¹³Khayo buli shibuumbe shiruuye lisiina ly'Omukasya! Khulwekhuuba niye yenyene isi khwaakhiile khuruuya! Shiriifwa sheewe shili she angaaki khuuminyisakho likulu ni shiibala.

¹⁴Niye waakalusile babaandu beewe khuuba be kamaani, khayo abo boosi babaamwisaaya bamuruuye. Khulwekhuuba babaandu be mu Isiraeli bali babeewe. Ruuya Umukasya!