Read lumasaaba Tsizabuli 16 Bible Online

Tsizabuli 16 - lumasaaba bible

Tsizabuli 16

¹O Wele, n'uniinde lwekhuuba iwe niye isi ise ndimakayo waniinda.

²Ise inoma Umukasya wase ndi, “Iwe uli Umukasya wase, biilayi byoosi byeesi ise ndi nabyo byaama isi iwe.”

³Babaandu bakwalaafu ni baba mu shibala baba babeyikinwa, ni kumwikhoyo kwase kumukali kubawo khulwaabwe.

⁴Babaandu babaakhalawo khukhwisaaya ba wele babaandi bereerakho kumutaambo kumukali. Ise singene nitubaase mu khuwaanayo tsisaayilo tsaabwe tse khukhwiira bisolo ta, namwe ise singene nisaaye ba wele baabwe ta.

⁵Umukasya, iwe niye sheesi ndi nasho nga she buusikha bwase; Iwe niye uwuntsitsusa ise ni tsikhabi, buulamu bwase bwe buraangisi buli mu makhono koowo.

⁶Ise bye kumukabo kwase byoosi byaantsiliile buulayi; kumukabo kwase kuli kumulayi ilala.

⁷Ise imbuyilisa Umukasya lwekhuuba niye aamba ise kamakhula, ni mu shilo namwo kumwoyo kwase kungaambila.

⁸Ise namanya ndi Umukasya ali ni nase busheele, ali aambi ni nase singene injiyaane ta.

⁹Isho shikila kumwoyo kwase kwitsula kumwikhoyo, ni buulamu bwase bwaaba nga buli mu lukoosi.

¹⁰Lwekhuuba iwe s'undekha ise khuutsya imakoombe ta, namwe s'unyala waalekha umukhosefu woowo khuubola ta.

¹¹Iwe untsokesa ise kumukhoosi kwe buulamu; mu moni tsoowo iliyo kumwikhoyo kumwitsufu, mu mukhono kwoowo kumulayi mulimo bibireera kumwikhoyo biilo ni biilo.