Read lumasaaba Tsizabuli 17 Bible Online

Tsizabuli 17 - lumasaaba bible

Tsizabuli 17

¹O Umukasya, wulila khukhwilootsa khwase khwa ŋali, niwinaaneyo urekeerese byeesi ikhuloomba. N'uwulile khuuloomba khwase khwa ŋali.

²Iwe wenyene niye umanyile uri ise siindikho kumusaango ta, lwekhuuba iwe waamanya sha ŋali nga ni shili.

³Iwe waamanya bibiili mu mwoyo kwase, abe waakheetsa mu shilo wantsema, singene unyoolemo ilomo yoosi imbi mwiise ta. Ise singanikhakho ilomo yoosi imbi ta.

⁴Ise siindi nga babaandu babaandi ni bali ta; babaakanikhaka bilomo biibi, ise naakhuuloondelela tsintsila tsaabwe tse bituluungu ta.

⁵Busheele ise injeendela mu mikhoosi kyoowo, naakhururatsakamo taawe.

⁶O Wele, ise inoomba isi iwe, khulwekhuuba iwe untsilamo. Aso n'ureke khukhuru khwoowo, uwulile byeesi ise ikhuloomba.

⁷Niwokyesanise khuukana khwoowo khwe kamaani, iwe Umuwonesi waabo babaatitukhila is'iwe, khu mukhono kwoowo kumulayi iliyo buwonesi.

⁸N'uniinde ise nga shisikye ni shibiimba khu moni iye mukari, n'umbise mu shisiisa she tsindaaha tsoowo.

⁹Umbonese khukhwaama khu babi babaanangana ise, ni khukhwaama khu baasiku baase babaambiyila ise, babaantsibotokhelela nga bakana khukhuuntsira.

¹⁰Nibo sibalikho ni shiisa ta, ne bakanikha bye khukhwiyiinga byonyene.

¹¹Ari baantsibotokheleele, nga buli isi intsya baandeerekho tsimoni. Baandolelela nga baweentsa kumukhoosi kwe khukhuungwiisa ise aasi.

¹²Bali busa nga italanyi iyibuulila isaanyi yayo, bali busa nga italanyi inyana iyirekekhile khuutyeenuulakamo isaanyi yayo.

¹³O Umukasya, niwinyukhe usoolanise baasiku baase ubawule! N'uwonese buulamu bwase khukhwaama isi baabi nga uraambisa lurima lwoowo.

¹⁴O Umukasya n'umbonese khukhwaama isi babaandu baabi, isi babaandu babaali na byoosi byeesi bakana mu buulamu bwe shibala. N'ubawe bibiindu biikali byeesi iwe wabaŋoonaŋoonela, ni babaana baabwe bafune bibibamala, ni bibiindi biramewo bibilimala ni babetsukhulu baabwe.

¹⁵Ne ise ndikhubonakho lwekhuuba s'indikho ni shiibi ta; ise n'indisisimukha inditsusibwa ni kumwikhoyo, ni tsimoni tsase tsilikhubonakho khuusi iwe nga n'uli.