Read lumasaaba Tsizabuli 18 Bible Online

Tsizabuli 18 - lumasaaba bible

Tsizabuli 18

¹O Umukasya, ise ikhukana iwe, iwe niye umuliindi wase.

²Umukasya niye lulwaanda lwase, niye buliindi bwase. Wele wase niye lulwaanda lwase, niye bubwilukhilo bwase, niye uwuniinda nga ingabo yase. Niye aniinda, luundi andimiilila waaniinda buulayi.

³Ise nilootsela Umukasya, niye waambonesa ise khukhwaama isi baasiku baase. Aryo niye aakha khuuruuyibwa.

⁴Buwaangafu bwe khuufwa bwaantsibotokhelela ise, ni khuungu ye khuuhela yaantsikhakho.

⁵Buwaangafu bwe khuufwa bwaantsibotokhelela ise, ni kimireko kye khuufwa kyeereka khukhuumaambisa ise.

⁶Nga ndi mu mutaambo kwase, ise nelootsela Umukasya, nalilila Wele wase khukhuunjeeta. Ni naye aawulila likono lyase nga ali mu Lisaayilo lyeewe Likhosefu, naluundi waarekeeresa khuulila khwase khwe buyeeti.

⁷Shiryo shibala shaanikina luundi shaatengaasibwa. Kimisiinji kye tsinjiinji tsyayeŋaana, lwekhuuba Wele aaba waakhalaale.

⁸Lisuusi lyetuukha khukhwaama mu moolu keewe, ni kumulilo kukuutindiima ni kamaanda kakoosha, byaama mu mukhanwa mweewe.

⁹Niye onuula likulu, weekha aasi, ni shishiilima shikali shaba aasi e bikyele byeewe.

¹⁰Niye apamburukhila khu ndaaha tse shishiindu shishiili nga malayika waapamburukha ni kamaani kamakali nga ikhuungu niwuutsa.

¹¹Niye efuunikhilila mu shiilima shaamubisa, webiimbilila mu mafuumbi kamamali kaamwibotokhelela, kamafuumbi kakaareera ifula.

¹²Kamararara ni kamaanda ke kumulilo byaama mu khumulikha khukhuuli mu moni tseewe, biryo byaabira busa mu mafuumbi ke kamaani ako.

¹³Lwanyuma Umukasya waapapanukhila mwikulu, ni likono lyooyo uuli Angaaki luukali lyaawulilikha. Aryo abawo kamararara ni kamaanda ke kumulilo.

¹⁴Niye alasa buyiingo bweewe, waasalanisa baasiku beewe, ni khuumulikha khuukali waabasalanisa boosi.

¹⁵Mu lwaalo lwe nyaantsa mwabonekha, ni kumusiinji khweesi shibala shiimikhilekho kwabonekha ibulafu. O Umukasya, uryo nga ni wabarafuyila baasiku boowo, luundi wabakhookhela mu lirima lyoowo.

¹⁶Umukasya ekhisa aasi kumukhono kweewe khukhwaama mwikulu, waambukula ise, waakhweesa ise khukhwaama mu meetsi kamakali waandusa ibulafu.

¹⁷Niye ise khukhwaama isi baasiku baase be kamaani, ni khukhwaama isi babaambiiyila lwekhuuba baaba baafuura ise kamaani.

¹⁸Baantsibwakala khu shifukhu sheesi naba nga ndi mu mutaambo, ne Umukasya niye uwaandimiilila.

¹⁹Niye aanjeeta waandusa mu bukosi, waambonesa ise lwekhuuba antsikhoyela.

²⁰Umukasya aamba ise kumukheemba kwase lwe bukwalaafu bwase, naluundi aamba tsikhabi lwekhuuba ise sinabakho ni kumusaango kwoosi ta.

²¹Lwekhuuba ise naloondelela kamakaambila k'Omukasya, naluundi naakhururakho khu mukhoosi kwa Wele wase ta.

²²Ise nawaamba kamakaambila keewe koosi, ni biilakilo byeewe, luundi naakhumiinyaalilakho kamakaambila keewe ta.

²³Ise sinabakho ni kumusaango mu moni tseewe ta, ise naayiliinda samweene khuulekha khukholakho shiibi shoosi ta.

²⁴Ni lwe lomo yino, kila Umukasya aamba ise shiwaanwa shase nga bukwalaafu bwase ni buli, lwekhuuba aashimanya ari ise siindikho ni kumusaango ta.

²⁵O Umukasya, iwe uli uwaŋali isi abo babaali baŋali is'uli, luundi uli umukhosefu isi abo babaali nga sibalikho ni lisaanda lyoosi ta.

²⁶Iwe uli Umukwalaafu isi abo babaali bakwalaafu, ne uli umurafu isi abo babaaborokha.

²⁷Iwe uwonesa abo babaali baawolu, ne iwe wikhisa aasi abo babeyiinga.

²⁸Iwe Umukasya Wele wase umaambisila itaala yase waamba buwaanga, ukalusa shishiilima sheesi indimo khuuba buwaanga.

²⁹Iwe unjeeta khuuwula baasiku baase, ni lwe bunyali bwoowo Wele wase, ise inyala khuuruuka tsimako tsaabwe.

³⁰Wele oyu tsintsila tseewe tsili tsingwalaafu, byeesi asuubisa biyikinikha. Niye ali ingabo y'abo boosi babaatimaka is'ali lwe buliindi.

³¹Naanu niye uuli Wele? Akhali Umukasya yenyene niye uli Wele. Naanu niye lulwaanda lweefwe? Akhali Wele weefwe yenyene niye uuli lulwaanda.

³²Niye ali Wele uwumba ise kamaani, luundi niye uwuŋoonela intsila yase yaalekha khubamo buukosi ta.

³³Niye awandalasa bikyele byase waabiwa kamaani byaaba nga bye khisi, aryo waaniindila mu njiinji nga ndi mu lukoosi.

³⁴Andeekela ise bye busoolo, nio naanyalisa khuutsanuusa buyiingo bwa buroonzi.

³⁵O Umukasya, iwe waayiimba ise ingabo ye buwonesi, ni kumukhono kwoowo kumulayi kwantsayilisile ise, ni buliindi bwoowo bwaakholile ise khuuba umuundu umukhulu naabi.

³⁶Wambalaayisiile ise intsila lwe bikyele byase, ni bikyele byase byaakhureremukha naakwa ta.

³⁷Ise ndimisa baasiku baase naabawaamba, naluundi singene indureyo ta khukhwoolesa nga naabaheseele ilala.

³⁸Mbakhupila ilala aasi, baalekha khunyala khukhwinyukhawo ta; baarama nga baakwiile aasi e bikyele byase.

³⁹Iwe niye uwuumba ise kamaani ke khuusoolana; luundi iwe niye ukila naawula baasiku baase.

⁴⁰Iwe niye uwaakila baasiku baase baatima baandurakho, ni naabo boosi babaambiyila nabahesa.

⁴¹Nibo baalila lwe buyeeti, nga mbaawo na mutweela ubawonesa ta, belootsa isi Umukasya, ne niye s'abeelamo ta.

⁴²Ise mbatsuungaka bekyela busa nga lifukhuulu liliyilibwa ni mbewo; imbasaambakilila busa nga litosi lye khu mikhoosi.

⁴³Iwe wambonesa ise khukhwaama isi babaandu be bisaayumba; uryo waangalusa ise khuuba umuwuli we kamanaambo, babaandu abe beesi ikhaamanya ta, bekyela babaantsakaanisa ise.

⁴⁴Banaambo beetsa baafukhamilila ise; ni bawulila bilomo byase baabifukiilila.

⁴⁵Banaambo beene bawamo kamaani, beetsa nga banikina busa khukhwaama mu bifwo byaabwe mweesi beebisa.

⁴⁶Umukasya ali mulamu! Niye lulwaanda lwase, aruuyibwe naabi! Naluundi boolelesa bukhulu bwa Wele uwumbonesa ise.

⁴⁷Niye Wele uwunyalisisa ise khuuwula baasiku baase, weesa kamanaambo aasi aase

⁴⁸naluundi waambonesa ise khukhwaama isi baasiku baase. O Umukasya, iwe uwuumba ise kamaani waakila ise naawula baasiku baase, uniinde ise khukhwaama isi babaandu babetsuule buurafu.

⁴⁹Lwashino shishiikila ikhuboolelesa akari mu manaambo, O Umukasya, kane niimbe khuukhubuyila lisiina lyoowo.

⁵⁰Wele awa buuwuli bwe kamaani isi umuyiinga weewe umurobole, naluundi okesanisa khuukana khuukali isi umurobole weewe, isi Dawudi n'isi babetsukhulu beewe biilo ni biilo.