Read lumasaaba Tsizabuli 19 Bible Online

Tsizabuli 19 - lumasaaba bible

Tsizabuli 19

¹Likulu lyokyesana shiriifwa sha Wele; ni neebyo bibiili mwibaanga bibuula buraambi bwe kamakhono keewe.

²Buli shifukhu shishibira shiboolelakho shishiindi shishiilakho, ni shiilo shishiwakho shiboolelakho shishiindi bye kamakyesi.

³Mbaawo inganikha namwe bilomo byeesi biraambisa ta, ni likono lyabyo siliwulilikhana ta,

⁴ne likono lyabyo litsya lisalanila mu shibala shoosi, ni bilomo byabyo byaatsya byawulilikha iyo n'isi shibala shakama. Mu ngaaki iyo mwikulu nimwo mweesi Wele akholela inyaanga bubwikhalilo bwayo.

⁵Inyaanga nyene iyo irura kumutikhinyi, nga n'ubona umusaani umweeha n'arura mu ntsu yeewe, naluundi irakikha lukyeendo lwayo yaba busa nga umutimi we tsiindimo uwe kamaani.

⁶Irura nga yaama khu lubeka lutweela lwe likulu yaatsya khukhwoola khu lubeka luluundi; mbaawo shishiindu shoosi shishibisa khukhwaama khu bukhafu bwayo ta.

⁷Likaambila ly'Omukasya lili likwalaafu, nilyo lisamo kamaani bushaakha; khuuleekela khw'Omukasya khwiyikinikha, khuwa kamakyesi abo babaakhali nako ta.

⁸Khuuleekela khw'Omukasya khuli khuukwalaafu, khwikhoyesa kumwoyo; likaambila ly'Omukasya lili likhosefu, lireera khuumanya mu byambaaso.

⁹Khuurya Umukasya khuli khuulayi, nikhwo khwiloosela biilo ni biilo. Isaambo isi Umukasya akhalamo kimisaango ili iya ŋali, naluundi ili indayi buli busheele.

¹⁰Ibyo nibyo bibyaakha khuukanibwa naabi khufuurakho ni zaabu ifuura buulayi; nibyo bili biitokota naabi khufuurisakho bubuushi bwe ntsushi bubweene.

¹¹Bibyeene ibyo nibyo bibireewula umwakaanisi woowo; ni khuubiloondeelela mulimo kumukheemba kumukali.

¹²Ne naanu unyala khuubona bibyoonako byeewe umweene? Ise n'usiingekho bibyoonako byase bibiibisile.

¹³N'uniinde ise umwakaanisi woowo khukhwaama khu bibyoonako bya lubuula; ukhaandekha byaanyalisa khukhuumbula ta! Nio nase ndyo imbe ukhalikho ni she khuubiyisibwa ta, imbe nga siindikho ni shishoonako she kamaani ta.

¹⁴Khali bilomo bye mukhanwa mwase ni bibyambaaso bye mu mwoyo kwase, bisiimibwile mu moni tsoowo, O Umukasya, iwe niye isi nilukhilayo naluundi iwe niye umuwonesi wase.