Read lumasaaba Tsizabuli 2 Bible Online

Tsizabuli 2 - lumasaaba bible

Tsizabuli 2

¹Lwashiina kamanaambo kambaasa bye bisaayumba? Ni babaandu lwashiina bambaasa bibikhalimo ta?

²Bayiinga be shibala beemikha nga berekekhele, ni bawuli bateesela atweela khuukhaandisa Umukasya n'umuyiinga weewe umurobole,

³nga baloma bari, “khakhwirusekho buuwuli bwaabwe, khakhwiyabule kiminyololo kyaabwe.”

⁴Ne Umukasya uwikhala khu shitsoloŋo angaaki mwikulu abatsekhelela busa, luundi waalekelesa tsinengekharengekha tsaabwe.

⁵Lwanyuma mu lirima lyeewe waabarafuyila luundi waaraambisa buurafu bweewe buukali khuubariisariisa nga aloma ari,

⁶“Khu lukiingi lwase lukhosefu Sayuuni, ise naayikhasakho umuyiinga wase.”

⁷Umuyiinga tsana waaloma ari, “Kane ingukuule likaambila mweesi Umukasya anomela ari, ‘Iwe uli umwaana wase, shaleelo ise neekyelile Paapa woowo.

⁸Ari n'unoombe ise shishiindu shoosi sheesi ukana, ni nase kane ikhuwe iwe kamanaambo koosi nga buusikha bwoowo, ni shibala shoosi shibe shishoowo.

⁹Iwe ulibafuniaaka nga uraambisa imiimbo iye shiibya, ulibabulyungula nga ni babulyungula inyuungu iye liloba.’ ”

¹⁰Nashiryo, ari inywe bayiinga ni mundekeerese, mwiyike, mube ni kamakesi inywe baawuli be shibala.

¹¹Ni mwakaanise Umukasya nga muli ni khuumurya naluundi nga muli baawolu.

¹²Fukhamilila umuyiinga lwe khuumurya, nio manya alekhe khukhalala ta, shishinyala khuubareerera khuuhela. Lwekhuuba lirima lyeewe linyukha khaangu. Bali ni khabi abo babaamwiyunayo isi ali lwe buliindi.