Read lumasaaba Tsizabuli 21 Bible Online

Tsizabuli 21 - lumasaaba bible

Tsizabuli 21

¹O Umukasya, umuyiinga ali musangaafu, lwekhuuba iwe niye umuwa kamaani; naluundi ekhoya lwekhuuba iwe umunyalisa khuuwula mu busoolo kimiluundi kimikali.

²Iwe waamuweele sheesi kumwoyo kweewe kufuura khuukana, naluundi waamwililemo khuuloomba khweewe.

³Iwe weetsa is'ali ni tsikhabi tsingali; uryo waamurakho khu murwe kweewe lihabi lye zaabu.

⁴Niye aakhuloomba iwe buulamu bwa penani, nawe waabumuwa, naluundi wamuwa biifukhu bileeyi bye biilo ni biilo.

⁵Shiriifwa sheewe shili shikali lwe kamaani koowo; waamuweele lubuyi ni bukhulu bukali.

⁶Ilala wamuwa tsikhabi tse biifukhu byoosi, ni khuubawo khwoowo is'ali khumwitsusa ni kumwikhoyo.

⁷Lwekhuuba umuyiinga niye eyikina Umukasya; ni lwekhuuba Umukasya amukana luukali, niye singene abekho ni she khuurya ta.

⁸Umuyiinga aliwaamba baasiku beewe boosi; ni kumukhono kweewe aliwaamba abo boosi babaamubiyila.

⁹Nga waabonekhele alibahesa busa nga kumulilo kukuutindiima. Umukasya alibahesa khulwe lirima lyeewe, ni kumulilo kulibamalawo.

¹⁰Alimalawo babaana baabwe ni babetsukhulu baabwe; umuyiinga aliihesa babaana baabwe boosi khu shibala.

¹¹Abe baakhakhola tsimbomelo tsaabwe khu niye naluundi abe baakhakhaka barye, sibalinyala khuumukholakho buubi bwoosi ta.

¹²Lwekhuuba alibalasamo buyiingo mu moni tsaabwe; boosi bashuukhe batitukhe batsye.

¹³O Umukasya, ifwe khukhuruuya iwe lwe kamaani koowo kamakali! Ifwe kane khwiimbe kimyeenya khuruuye bunyala bwoowo.