Read lumasaaba Tsizabuli 22 Bible Online

Tsizabuli 22 - lumasaaba bible

Tsizabuli 22

¹Wele wase, Wele wase, iwe lwashiina undekhile? Lwashiina iwe umbeela aleeyi waalekha khunjeeta ta, naluundi waalekha khuwulila khuulila khwase ta?

²O Wele wase, ikhwilootsela kumuusi, ne iwe siwilamo ta; ni mu shilo ikhwilootsela ne sifuna lukoneele ta.

³Ne iwe uli Umukhosefu, uwikhala khu shitsoloŋo shoowo, ni babaandu ba Isiraeli bakhuruuya iwe.

⁴Iwe niye isi bakuuka beefwe beyikinatsaka; baakhwiyikina ni nawe waabawonesa.

⁵Nibo baakhwilootsela baawonesebwa mu bukosi; baakhwiyikinatsaka iwe nawe siwabaantsukha ta.

⁶Ne ise ndi lukhanu busa, s'indi muundu ta. Babaandu boosi baakhomaka ise luundi baandekelesa.

⁷Babaandu boosi babaambona ise baantsekhelela busa, luundi baandyaabila nga baandosamo kiminwa kyaabwe, batengaasa busa kimirwe kyaabwe; baaloma bari

⁸“Eyikinatsaka Umukasya, khayo Umukasya mweene amuwonese. Noola Umukasya amukana, n'amuyeete!”

⁹Ate nga iwe niye uwandusa ise muunda ya maayi; iwe niye uwaniinda ise nga ishinuuna libeele lya maayi wase.

¹⁰Iwe niye isi ise niyikina khukhwaama lweesi nasaalikhila, ni khukhwaama ni abweene awo, iwe ubeelatsakile Wele wase.

¹¹Iwe ukhambeela aleeyi ta, lwekhuuba bukosi buundi aambi naabi, nga mbaawo na mutweela unyala khukhuunjeeta ta.

¹²Baasiku baakali baantsibotokheleele ise nga tsiwuunwa, boosi baantsibotokheleele ise nga tsiwuunwa tse kamaani tsindafu tsitsaama mu shibala sha Bashani.

¹³Baasamile mukhanwa mwaabwe baandoseleele ise nga tsitalanyi tsitsibuutsa tsikana khuundya.

¹⁴Ise naawetsekheleele kamaani ndi busa nga kameetsi kakaamilikhiile mwiloba, ni kamakuumba kaase kali busa nga kaafunikhakile; ni kumwoyo kwase kwaayengukhakiile mu shifuba shase nga bunini ni buyengukha.

¹⁵Mukhanwa mwase mwoomile busa nga luutsyo ni lwooma, ni lulimi lwase lwewaambile mu khanwa mwase mu ngaaki; iwe waandekhile ise ifwiile mwifukhuulu.

¹⁶Libungiitsi lye babaandu baabi lyaantsibotokheleele nga tsiimbwa bandeere khukari; baawunakile kamakhono kaase ni bikyele byase.

¹⁷Kamakuumba kaase koosi kabonekha. Baasiku baase bandolelela nga baangalulusilakho tsimoni.

¹⁸Bakabanana bikwaaro byase, tsingubo tsase batsikhupilakho khaakokha.

¹⁹Ne iwe Umukasya ukhambeela aleeyi ta! Iwe uli umuyeeti wase, n'undimilile unjeete khaangu!

²⁰N'umbonese ise khukhwaama khu lurima lwe baasiku baase, buulamu bwase ubuwonese isi tsiimbwa.

²¹N'umbonese ise khukhwaama isi tsitalanyi, uwonese buulamu bwase khukhwaama isi tsiintsika tse tsimboko.

²²Ise ndiruumbula lisiina lyoowo mu balebe baase, indikhuruuyila akari mu lubusano lwe baafukiilisi.

²³Inywe babesaaya naluundi baarya Umukasya ni mumuruuye! Inywe lisaaye lya Yakobo ni mumwiisemo shiriifwa! Inywe babaandu ba Isiraeli mweesi, ni mwisaaye Umukasya!

²⁴Lwekhuuba niye s'alekelesa namwe s'alekha khukhwiinaanayo isi abo babaali mu mutaambo ta; namwe s'abeebisakho isi bali ta, ne khuuwulila abawulila abo babaamwilootsela nga bakana buyeeti.

²⁵Mu lubusano lwe babaandu boosi; ise kane ikhuruuye lwe biikali byeesi ukholile; ibyo byoosi byeesi neyama kane imbyoolelese mu moni tsaabo boosi babaakhwisaaya.

²⁶Bataambi balilya khukhwoolesa ni balikura; abo boosi babaaweentsa Umukasya balimuruuya! Abo khali babeele baalamu biilo ni biilo!

²⁷Babaandu be kamanaambo balishebulila bashuukhe bakobole isi Umukasya; babaandu be mu bibala byoosi balimwisaaya.

²⁸Lwekhuuba bunyala bwoosi buli bw'Omukasya, niye uwula kamanaambo koosi.

²⁹Babaandu boosi babeyiinga mu shibala balimufukhamilila; ni babaandu buundu busa boosi baliwunamila mu moni tseewe.

³⁰Babaandu be kimiboolo kikiitsa mu moni balimwakaanisa, babaandu balikanikha bibiwaamba khu Mukasya babiboolele be kumuboolo kukwiitsa iburaangisi.

³¹Babaandu babashili khusaalikha ta balibaboolela bari; “Umukasya awonesa babaandu beewe.”