Read lumasaaba Tsizabuli 25 Bible Online

Tsizabuli 25 - lumasaaba bible

Tsizabuli 25

¹O Umukasya, ise indeera khuuloomba khwase is'uli.

²O Wele wase, iwe niye isi niyikina, n'umbonese ndekhe khuwaambibwa tsisoni lwe khuuwulibwa ni baasiku baase ta; ukhalekha baasiku baase baambula ise ta.

³Ilala ukhalekha abo babaakhwiyikina iwe baawulibwa ni baasiku baabwe ta. Khuurusakho ni waantsukhe abo babaayubakilisa khuukhola tsimbomelo.

⁴O Umukasya, n'untsokese ise imanye kimikhoosi kyoowo; n'undeekele ise kimikhoosi kyoowo.

⁵N'unaangilile ise, undeekele mu bwa ŋali bwoowo, lwekhuuba iwe uli Wele wase uwumbonesa ise; naluundi iwe niye isi ise niyikina buli busheele.

⁶O Umukasya, n'ushebulile shiisa shoowo ni khuukana khwoowo khukhuukhakama ta, nga nibyo byeesi wokyesanisa khukhwaama khaale ni khaale.

⁷Ukhashebulila bibyoonako byase namwe buubi bwase bweesi ise nakhola mu busooleli bwase ta. Ne lwe khuukana khwoowo khukhuukhakama ta, ni lwe buulayi bwoowo, n'ushebulile ise, O Umukasya!

⁸Lwekhuuba Umukasya ali Umukwalaafu luundi umulayi; niye aleekela baboonaki kumukhoosi kweewe khuukuloondelela.

⁹Umukasya araangirira babaandu baawolu mu khukhola bya ŋali, luundi abaleekela khuukhola byeesi akana.

¹⁰Kimikhoosi ky'Omukasya kili kye khuukana naluundi kili bubwiyikinwa isi abo baboolelesa indakaano yeewe, luundi baawulila kamakaambila keewe.

¹¹O Umukasya, khulwe buulayi bwe lisiina lyoowo, niiwolelese sheesi wasuubisa, untsiyakhile ise bibyoonako byase lwekhuuba bili biikali naabi.

¹²Naanu niye umuundu uwisamo Umukasya shiriifwa? Umweene uyo Umukasya alimuleekela kimikhoosi kyeesi aakha khuukyeendelamo.

¹³Umuundu mweene uyo aliba umuyindifu nga afuna biilayi, ni babaana beewe balifuna shibala nga nisho busikha bwaabwe.

¹⁴Umukasya ali musaale waabo boosi babaamuwa shiriifwa, ni naye aliŋaŋasa indakaano isi aakhola ni nabo.

¹⁵Tsimoni tsase tsilolelela Umukasya biifukhu byoosi, ni naye ambonesa ise khukhwaama mu mireko kyoosi.

¹⁶O Umukasya, n'unjebulile ise umaambile shiisa, lwekhuuba naaramile seenyene naluundi imbonabona.

¹⁷N'undusekho bubwiyembelefu bweesi ndi nabwo, naluundi unduse ise mu bitaambiso byase byoosi.

¹⁸Yambaasa khu mutaambo kwase, ni khu khubonabona khwase, uryo untsiyakhile ise bibyoonako byase byoosi.

¹⁹N'ubone baasiku beesi ndi nabo nga ni bali baakali, n'ubone nga nibambiyila ise naabi.

²⁰N'uliinde buulamu bwase luundi umbonese; n'uniinde indekhe khuwulibwa ta, lwekhuuba ise niitsa is'uli khufuna buliindi buulayi.

²¹Khali bukhosefu ni bwa ŋali biniindatsakile, khulwekhuuba ise ikhwiyikina iwe.

²²O Wele, n'uwonese Isiraeli khukhwaama mu bikosi byaabwe byoosi.