Read lumasaaba Tsizabuli 26 Bible Online

Tsizabuli 26 - lumasaaba bible

Tsizabuli 26

¹O Umukasya, n'ube umukayi wase nio kumusaango kulekhe khukhuufuura ise ta, lwekhuuba ise ikhola bye bukwalaafu, luundi ikhwiyikina iwe akhali khukhwiiririkana ta.

²O Umukasya, n'untsofwaase ise naluundi untsimenielese; ubone kumwoyo kwase ni bibyambaaso byase nga ni bili.

³Lwekhuuba khuukana khwoowo khukhuukhakama ta khuniinda ise, ni mu bwa ŋali bwoowo nimwo mweesi ise injeendela.

⁴Ise sinikhala atweela ni babaandu babeeyi ta, namwe sinitubaasa ni babaandu babekholisa ta.

⁵Ise sikholakana ni lituuli lye babaandu baboonaki ta, naluundi ise sifukiilila khukhwikhala ni baabi ta.

⁶O Umukasya, ise isaaba kamakhono kaase khukhwookesanisa nga n'ikhalikho ni kumusaango ta, indyo naatsya nesaayila mu shifwo shoowo shikhosefu,

⁷nga neemba kumweenya kwe khukhusiima iwe, naluundi nga inganikha khu buraambi bwoowo bwoosi buulayi bubwiyangisa.

⁸O Umukasya, ise ngana naabi intsu yoowo mweesi iwe umenya, ni shifwo mweesi shiriifwa shoowo shimenya.

⁹Iwe ukhaakhola ise naahelela atweela ni baboonaki ta, buulamu bwase ukhabuhesela atweela ni babaandu babeeri ta.

¹⁰Nibo babaandu babaakhola buubi imbuka yoosi, naluundi buli mbuka berekekha khuulya iwoongo.

¹¹Ne ise ikhola sheesi imanyile ndi shili shikwalaafu; n'umaambile shiisa ise uryo umbonese.

¹²Ise nemikhile mu shifwo sheesi niyikina; kane n'isaayatsake Umukasya mu lituuli lye babaandu beewe liikali.