Read lumasaaba Tsizabuli 27 Bible Online

Tsizabuli 27 - lumasaaba bible

Tsizabuli 27

¹Umukasya niye buwaanga bwase naluundi niye Umuwonesi wase; mbaawo umuundu isi ise nyala naarya ta. Umukasya niye uwuniinda ise mu bikosi, naanu unyala waandiisariisa ise?

²Nga babaakhola buubi bantsibwakaala, nga bakana khukhuuntsira, betuya boosi luundi baakwa aasi.

³Ikhaba nga liihe lyoosi lintsibotokhelela khukhuusoolanisa ise, kumwoyo kwase singene kurye ta; abe ikhaba nga busoolo bwakhangwakho, ise niloosela khuuba nga niyikina Umukasya.

⁴Iliwo ilomo ndweela isi ise inoomba khukhwaama isi Umukasya, nga nisho sheesi imeentsa; niyo ndi khuumenyatsaka mu ntsu y'Omukasya biifukhu bye buulamu bwase byoosi, ni khuulolelelatsaka khu bulayi bw'Omukasya, ni khuumwisaayatsakila mu Lisaayilo lyeewe Likhosefu.

⁵Lwekhuuba khu mbuka iye bukosi, kane aniindile ise mu ntsu yeewe, kane ambise ise buulayi mu Lisaayilo lyeewe likhosefu, ambiikhe ise buulayi isi bukosi bukhanyala khukhuuntsolelakho ta.

⁶Nashiryo ise ndiwula baasiku baase boosi babantsibotokheleele; indiwaanayo tsisaayilo mu Lisaayilo lyeewe Likhulu nga nikhoya; Indyeemba kimyeenya nga imbuyila Umukasya.

⁷O Umukasya, n'uwulile khulila khwase, n'umaambile ise shiisa, untsilemo khuuloomba khwase!

⁸Iwe ni waloma uri, “Nimwiitse muntsisaaye.” Nase nelamo ndi, “Kane ikhwisaaye, O Umukasya.”

⁹Ukhaantsibisakho ta. Ise ndi umwakaanisi woowo, ukhamboona khukhwaama is'uli nga wakhalaale ta. Iwe niye ubeele umuyeeti wase. Ukhaandekha ise namwe ukhantsisisakula ta, O Wele Umuwonesi wase!

¹⁰Paapa wase namwe maayi wase banyala baandurakho, ne Umukasya umweene kane aniindatsake ise.

¹¹O Umukasya, n'undeekele ise kumukhoosi kweesi iwe ukana ise inondelele, n'unaangilile mu mukhoosi kumulayi, lwekhuuba ndi ni baasiku baakali.

¹²Ukhaandekha waambaanayo isi baasiku baase bantsolesakho buubi ta, lwekhuuba baantsibwakaala luundi baakanikha bye bubeeyi khwiise nga betsuule lirima.

¹³Ise niyikina ndi: kane imbewo mulamu inyalise khuubona buulayi bw'Omukasya mu shibala shino.

¹⁴Iwe ni wiyikine Umukasya, wilemo kamaani, kumwoyo kwoowo kukhawamo kamaani ta. Ni abweene, iwe niwiyikine Umukasya.