Read lumasaaba Tsizabuli 30 Bible Online

Tsizabuli 30 - lumasaaba bible

Tsizabuli 30

¹Ise ikhuruuya iwe Umukasya, lwekhuuba iwe waambonesele ise khukhwaama imakoombe, waalekha khufukiilila baasiku baase khukhuuntsikanilakho ta.

²O Umukasya Wele wase, ise nakhulilila iwe nga ingana buyeeti, ni nawe waambonesa.

³Iwe wakobosa buulamu bwase khukhwaama imakoombe. Ise naba niikha i makoombe, ne iwe wawonesa buulamu bwase.

⁴Ni mwiimbe kimyeenya khuuruuya Umukasya, inywe mu muuli baakhosefu beewe, muweyo khuusiima isi lisiina lyeewe Likhosefu.

⁵Lwekhuuba lirima lyeewe limala mbuka njeekhe iri, ne shiisa sheewe shili she biilo ni biilo. Kamasika kanyala khukhwirurukukha mu shilo, ne kumwikhoyo kwiitsa nga antsye bwasheele.

⁶Ni nase ni nawulila nga ndi buulayi, naloma ndi, “Sindinikinisibwakho na khafwiiti khoosi ta.”

⁷Ne khulwe shiisa shoowo, O Umukasya, waayiniinda waangumisa ise nga lukiingi; ne ni waantsibisakho, ise niyembelela!

⁸O Umukasya, ise nakhulilila iwe, ise nekoontselela Umukasya lwe buyeeti.

⁹Lisuno shiina lyeesi iwe ufuna nga ise nafwiile, namwe nga ise nekhile imakoombe? Lifukhuulu linyala khuukhuruuya iwe? Namwe linyala khuukhubuyila iwe nga n'uli uwa ŋali?

¹⁰N'umbulile, O Umukasya, umaambile ise shiisa! O Umukasya, n'unjeete!

¹¹Waakalusile kumutaambo kwase khuuba khuushiina khwe kumwikhoyo; waandusilekho ise kumutaambo kwase, waantsitsusile ise ni kumwikhoyo.

¹²Ni lwe lomo iyo, ise singene isile busa ta, kane ise ikhwiimbile iwe kimyeenya khuukhuruuya iwe. O Umukasya Wele wase, kane ise ikhusiimatsake iwe biilo ni biilo.