Read lumasaaba Tsizabuli 31 Bible Online

Tsizabuli 31 - lumasaaba bible

Tsizabuli 31

¹Ise nilukhila is'uli nga imeentsa buliindi, O Umukasya, ukhaandekha baasiku baase baaminya ise kamaani ta; khulwe bukwalaafu bwoowo n'umbonese ise!

²N'undekeerese, umbonese khaangu ari! N'ube isi ise nilukhilayo, uniinde, naluundi ube nga litikiiyi lye kamaani umbonese.

³Lwekhuuba ilala iwe uli isi ise nilukhilayo, naluundi uli busa nga ingabo iyiniinda ise; nga niwaanomela, n'ube umuraangilisi wase uniinde.

⁴N'unduse mu mureko kweesi bandekile ise, lwekhuuba iwe uli bubwilukhilo bwase.

⁵Ise niwaanayo kumwoyo kwase mu makhono koowo, lwekhuuba iwe umbonesa ise, O Umukasya; iwe uli Wele umwiyikinwa.

⁶Abo babesaaya bifwaani bibikhalimo ta, iwe s'ubakana ta, ne ise niyikina Umukasya.

⁷Ise kane nikhoye luundi isangaale lwe khuukana khwoowo khukhuukhawawo ta. Lwekhuuba iwe waabona kumutaambo kwase, luundi waamanya bukosi bwase.

⁸Iwe waakhundekha ise mu makhono ke baasiku baase ta, iwe waayindekhela ise lukoosi khukyeenda oosi isi ingana.

⁹O Umukasya, n'umaambile ise shiisa, lwekhuuba ise ndi mu mutaambo; tsimoni tsase tsaaluwile lwe khuulila khuukali, naawelelemo ilala kamaani.

¹⁰Kumutaambo kwaamaliilemo ilala ise kamaani, ni khuulila khwakheendesile buulamu bwase. Ise naaweelemo kamaani lwe kumutaambo kwase, ni kamakuumba kaase nako kafwiliile.

¹¹Baasiku baase bantsekhelela ise busa, ni babesanwa baase bambona ise nga she khukhwinyinyala; ni basaale baase babeene barya khukhwiitsa is'indi, nga bamboone khu ntsila baantsilukha.

¹²Boosi baayintsibilila baambila busa nga umuundu uwafwa; naayikyela busa nga inyuungu iyaatikhile.

¹³Ise mbulila baasiku baase baakali nga bemoonya; shiriisa shaantsibotokheleele tsimbeka tsoosi. Bakhala kamakyesi ke khuurusawo buulamu bwase.

¹⁴Ne ise ikhwiyikina iwe, O Umukasya, nga noma ndi, “Iwe uli Wele wase.”

¹⁵Ne buulamu bwase buli mu makhono koowo; iwe n'umbonese ise khukhwaama mu maani ke baasiku baase ni naabo babaangubyeenga ise.

¹⁶N'umaambile ise umwakaanisi woowo shiisa, umbonese ise lwe khuukana khwoowo khukhuukhawawo ta.

¹⁷Umukasya ikhwikoontselela iwe ukhaandekha ise naswaala ta. Lekha baabi nibo bakhaasikhe baswaale, khukhwoolesa ni kane beekhe imakoombe mu mbola busa.

¹⁸N'usilise kiminwa kye babeeyi abo, abo babeyiinga luundi be shikili babaalomaka buubi khu bakwalaafu boowo.

¹⁹Bilayi byoowo nga biikali, byeesi iwe wabiikhila abo babaakhwiisamo iwe shiriifwa! Babaandu boosi babona biilayi ibyo byeesi iwe ukholela abo babaakhwiyikina iwe.

²⁰Iwe ubabisa nibo buulayi baaba isi iwe wamweene uli, waabawonesa khukhwaama khu mbomelo tse babaandu. Iwe ubabisa nibo buulayi mu buliindi bwoowo, wabawonesa khukhwaama khuukhomo tsye baasiku baabwe.

²¹Umukasya aruuyibwe! Lwekhuuba wantsokesanisile ise khuukana khweewe khukhuukhawawo ta, nga ni naba akari mu shiriimba nga banangana.

²²Nga ndi mu khurya khuukali abe ise nelomela samweene ndi, “Naawonebwele khukhwaama mu moni tsoowo.” Ne iwe wawulila khukhwilootsa khwase, nga ise ni nakhwikoontselela, ndi unjeete.

²³Nashiryo ni mukane Umukasya, inywe mweesi babaakaanisi beewe babaali babeyikinwa. Umukasya aliinda abo babaamwiyikina; ne abo babeyiinga abawa shitaambiso

²⁴Inywe mweesi babaali ni kumwiyikino mu Mukasya, ni mube ni kamaani mwinyindaalile mu myoyo.