Read lumasaaba Tsizabuli 32 Bible Online

Tsizabuli 32 - lumasaaba bible

Tsizabuli 32

¹Ali ni khabi umuundu isi Wele eyakhila bibyoonako, naluundi isi Wele aasiingakho buubi.

²Ali ni khabi umuundu uyo isi Umukasya akhabala khuuba ni shishoonako ta, naluundi mu mwoyo kweewe nga simulimo bubeeyi ta.

³Ise ni nasila busa naalekha khwibiyisa bibyoonako byase ta, ise naweelamo ilala kamaani mu mubili kwase, khulwe khuulila khwase khukhwoolisa antsye ne bwelabula.

⁴Lwekhuuba kumuusi ni mu shilo iwe waamba ise shitaambiso; ni kamaani kaase kambweelamo ilala, nga kumuumu kwe shimiyu ni kwomesa kameetsi.

⁵Ne lwanyuma ise nebiyisa bibyoonako byase byoosi is'uli; nalekha khubisa bumoyaani bwase ta. Naloma ndi, “Khanibiiyise bumiinyi bwase isi Umukasya,” ni nawe waantsiyakhila ise khukhwoonaka khwase khwoosi.

⁶Kila buli mutweela ukhwakaanisa iwe aakha khuukhuloomba, nga ali mu mbuka ye bikosi; ni kameetsi ni kane kasalasale, singene kamwoolekho ta.

⁷Iwe niye isi ise niibisamo, kane umbonesatsake ise mu bukosi. Uryo ise witsusa kumwoyo kwase ni kumwikhoyo, lwe buwonesi bwoowo.

⁸Umukasya aloma ari, “Kane ise ikhuleekele iwe naluundi ikhulakilile kumukhoosi kweesi kane iwe ukyeendatsakilemo; kane ise ikhukaambile iwe naluundi imbe umuliindi woowo.

⁹Inywe mukhaba babaandu babaakhali ni kamakyesi nga iŋwaaŋwa namwe isolo ilaangibwa inyuumbu ta, nitso tsitsaakha khuutimisibwa nga baatsibowele shishuuma mukhanwa, namwe lukhoba mu shifuba shatso ta, nio bari tsinyalise khuuwulila.”

¹⁰Babaandu babaakhola buubi kane batsiinisibwe, ne abo babeyikina Umukasya kane baliindibwe ni khuukana khweewe khukhuukhakama ta.

¹¹Inywe babaali babaandu bakwalaafu ni musangaale naluundi mwikhoye. Inywe mweesi baawolu mu myoyo, ni muyokesele angaaki lwe kumwikhoyo.