Read lumasaaba Tsizabuli 33 Bible Online

Tsizabuli 33 - lumasaaba bible

Tsizabuli 33

¹Inywe mweesi bakwalaafu, ni mwiimbe kimyeenya ni kumwikhoyo lweebyo byeesi Umukasya akholele. Ni mwiimbe kimyeenya mumuruuye lwekhuuba shandyaakhiile ifwe khuumuruuya.

²Ni musiime Umukasya nga mukhupa biyilili, ni mu mwiimbile kimyeenya nga mukhupa kamatuungu.

³Ni mu mwiimbile niye kumweenya kumushaakha, mukhupe kamatuungu nga muraambisa kamakyesi ke angaaki, naluundi muyokesele angaaki ni kumwikhoyo.

⁴Lwekhuuba bilomo byeesi Umukasya aloma bili bya ŋali; ni neebyo byoosi byeesi akhola biyikinikhikha.

⁵Umukasya niye akana bwa ŋali ni bukwalaafu mu baandu beewe, ni shibala shoosi shetsuulemo khuukana khweewe khukhuukhakama ta.

⁶Khubirira busa mu lomo y'Omukasya, likulu lyakholebwa, aaloma bulomi ilomo, nio inyaanga, kumweesi ni tsinieniesi byoosi byaakholebwa.

⁷Aabuusanisa atweela kameetsi koosi ke mu nyaantsa kaaba busa nga kakaali mu kyupa; aabuusa kameetsi koosi mwibuusanisilo litweela.

⁸Khayo shibala shoosi shiisaaye Umukasya, lekha babaandu boosi be mu shibala bamuwe niye shiriifwa.

⁹Lwekhuuba makiboole Wele n'aloma bulomi ilomo, shibala shakholekha; aryo n'alakila busa shibala shabonekha.

¹⁰Umukasya onakisa bitsilililwa bye kamanaambo, luundi waakosaasakosaasa tsiŋoonaŋoona tsaabwe.

¹¹Ne tsiŋoonaŋoona ts'Omukasya tsibawo biifukhu byoosi, ni bitsilililwa byeewe bimenyawo biilo ni biilo.

¹²Linaambo liliili ni Wele nga Umukasya walyo isi lisaaya lili ni khabi, babaandu boosi beesi umweene erobolela khuuba babeewe, bali ni khabi.

¹³Umukasya emikha mwikulu waalolelela aasi khu shibala, waabona babaandu boosi.

¹⁴Ibweene iyo niyo isi aba khu shitsoloŋo sheewe, nga alolelela babaandu boosi babaamenya khu shibala.

¹⁵Niye uwakhola kimyooyo kye babaandu boosi, nashiryo wamanya buli shimoonyo shoosi sheesi nibo bakhola.

¹⁶Umuundu uli umuyiinga s'awula mu busoolo lwekhuuba bari ali ni liihe liikali ta; namwe umusoolani s'awona khukhwiiribwa lwe kamaani keewe busa ta.

¹⁷Umuundu s'anyala weyikina tsiŋwaaŋwa khumuwonesa mu busoolo ta, namwe kamaani kaatso kamakali sikanyala kaamuwonesa ta.

¹⁸Ne Umukasya alolelela abo babaamwisaaya, abo babeyikina khuukana khweewe khukhuukhawawo ta.

¹⁹Niye abawonesa khukhwaama mu khufwa, naluundi waabaliinda nga baalamu mu biseela bye ntsala.

²⁰Ifwe kumwiyikino kweefwe khukura mu Mukasya; niye yenyene Umuyeeti weefwe luundi umuliindi weefwe.

²¹Ifwe khwikhoyela mu niye, lwekhuuba ifwe khwiyikina lisiina lyeewe likhosefu.

²²O Umukasya, khuukana khwoowo khukhuukhawawo khube khusiifwe, nga nafwe ni khuura kumwiyikino kweefwe musiiwe.