Read lumasaaba Tsizabuli 34 Bible Online

Tsizabuli 34 - lumasaaba bible

Tsizabuli 34

¹Kane ise isiimatsake Umukasya biifukhu byoositsana; kane ise imuruuyatsake tsindaalo tsoosi.

²Kane kumwoyo kwase kuruuyatsake Umukasya lweebyo byoosi byeesi akhola. Lekha abo boosi babaamiinilisibwa babiwulile bekhoye.

³Khakhutubaane atweela khuruuye Umukasya, fweesitsana atweela khakhuruuye lisiina lyeewe!

⁴Ise nekoontselela Umukasya ni naye waantsilamo, waangangulula khukhwaama mu khurya khwase khweesi ise naba nakhwo khwoosi.

⁵Abo boosi babaatsya is'ali lwe buyeeti bamweekhamweekha ni kumwikhoyo, naluundi sibaliwaambisibwa tsisoni ta.

⁶Umuundu ukhenyala amwilootsela nga ali mu mutaambo kweewe, n'Umukasya naye amwiilamo; wamuwonesa khukhwaama mu bikosi byeewe byoosi.

⁷Malayika w'Omukasya aliinda abo babesaaya Umukasya, naluundi waabawonesa khukhwaama mu bikosi byaabwe.

⁸Ni mwimenielese mubone nga Umukasya n'ali umulayi! Bali ni tsikhabi abo babaamwiyikina lwe buuliindi.

⁹Ni muwe Umukasya shiriifwa, inywe babaandu beewe babaali bakhosefu mweesi, lwekhuuba abo boosi babaamwisaaya mbaawo sheesi bataamba ta!

¹⁰Abe ikhaba tsinyana tse tsitalanyi intsala itsilya lwe khuutaamba she khuulya, ne abo babaatsya isi Umukasya, sibataamba shishiindu shilayi shoosi ta.

¹¹Ni mwiitse baana baase bakanwa mumbuliilise, ni nase kane imbaleekele isaambo iye khukhwisaaya Umukasya.

¹²Iwe ukana khufuna bibiindu biilayi mu bulamu? Ukana khuwaangala ufune kumwikhoyo?

¹³Aso, liinda lulimi lwoowo lulekhe khukanikha buubi ta, ni kumunwa kwoowo kulekhe khukanikha bye bubeeyi ta.

¹⁴N'ulekhelewo khuukhola bibiindu biibi, ukhole bibiindu biilayi, n'uweentse lukoosi naluundi ululiinde.

¹⁵Umukasya tsimoni tseewe tse shiisa atsiloselela isi bakwalaafu, waawuliilisa khuuloomba khwaabwe lwe buyeeti.

¹⁶Ne isi abo babaali baboonaki abalolelela ni lirima, ni khuubona ari nga bafwiile mbaawo ubashebulila ta.

¹⁷Babaandu bakwalaafu ni belootsela Umukasya lwe buyeeti, abawulila. Aryo waabarusa mu bikosi byaabwe byoosi.

¹⁸Umukasya aba aambi ni naabo boosi babaweelemo kamaani, awonesa abo boosi babewulila kumutaambo mu mwoyo kyaabwe.

¹⁹Umuundu umukwalaafu afuna bibiindu bimutaambisa biikali, ne Umukasya amuwonesa mu byoositsana.

²⁰Umukasya amuliindila ilala, mbaawo na litweela khu makuumba keewe lilifunikhakho ta.

²¹Babaandu baabi baliribwa ni buubi bwaabwe bubweene, ni naabo babaabiyila babaandu bakwalaafu, balifuna shitaambiso.

²²Umukasya awonesa buulamu bwe babaakaanisi beewe; mbaawo na mutweela khu nibo uwilukhila is'ali lwe buliindi, ulifuna shitaambiso ta.