Read lumasaaba Tsizabuli 35 Bible Online

Tsizabuli 35 - lumasaaba bible

Tsizabuli 35

¹O Umukasya, iwe khaandisana ni naabo babaakhaandisana ni nase; usoolanise abo babaasoolanisa ise!

²N'ubukule ingabo ifwiiti ni imboofu nyene, winyukhe unjeete ise.

³N'usowooleyo lifumo lyoowo ni yaywa yoowo, wiimikhe khu ntsila ye baasiku baase ubashinjilile! Unomele ise uri, “Ise ndi Umuwonesi woowo.”

⁴Lekha abo babaakhakakho khuuhesa buulamu bwase, bawaambisibwe tsisoni baswaale! Lekha abo babaaŋoonaŋoona khukhuukholakho ise buubi, beesibwe inyuma nga babuukabuuka busa, nga baswaalile!

⁵Khababe busa nga likhuutsi liliyilibwa ni mbewo, nga Malayika w'Omukasya abasalanisa.

⁶Lekha intsila yaabwe ibemo shishiilima ni buurerere, nga Malayika w'Omukasya abasalanisa.

⁷Lwekhuuba akhali ilomo yoosi ta, baandekire ise kumureko kwaabwe, luundi baayabile lilowo lileeyi, khukhuumaambilisa ise bantsire.

⁸Ne lekha khuuhela khubakwekho nga baakhumanya ta! Lekha babeene bakwe mu mureko abe kweesi baandekire ise; lekha babeene bakwe mu lilowo lyeesi bayabile babolele mu bweene umwo.

⁹Indyo nase lwanyuma nikhoyele Umukasya, nga ninyaha naabi lwekhuuba wambonesele ise.

¹⁰Bulamu bwase bwoosi kane ise buruuye Umukasya nga inoma ndi, “O Umukasya, mbaawo uli nga iwe ta. Iwe uwonesa uyo ukhali ni kamaani ta, khukhwaama isi abo babaali ni kamaani. Iwe uwonesa bataambi ni naabo babaakhali na khaandu ta, khukhwaama isi abo babaabamiinilisa.”

¹¹Babaandu babeeyi benyukhile aasi; nga bandeebelesa ise bibiindu byeesi ikhamanyilekho na khafwiiti khoosi ta.

¹²Nibo baandiyila ise buubi mu shifwo she buulayi bweesi nakhola, indyo ise naaweelamo ilala kamaani.

¹³Ne nibo ni balwaala, ise nakwaara bitsina nga nokesanisa kumutaambo, nebonabonisa samweene nga mbuya intsala, nekoontselela Wele nga newunamiile kumurwe kwase aasi.

¹⁴Ise naloomba nga ni nandiloombeele umusaale wase namwe wandaayase; ise nakyeenda nga newunamiile mu mutaambo, nga ufwiliile maayi weewe.

¹⁵Ne ise ni nakwa mu bikosi, boosi baantsibotokhelela beetsa atweela baantsonela. Ni babaandu beesi ikhaamanyakho ta baanuumba baakhomaka ise nga sibaakamisa ta.

¹⁶Baantsekhelela nga baantsonela, nga baantsomiisilakho tsimoni tse buubiiyile.

¹⁷O Umukasya, ulyoolesa eena khuubalolelela busa nga bakhola bino? N'undimilile ise umbonese khukhwaama isi abo babaakana khukhuuntsira. N'umbonese ise buulamu bwase khukhwaama mu meeno ke tsitalanyi.

¹⁸Ni nase ndyo kane ikhusiimile mu lubusano lwe babaandu baakali; indikhuruuyila akari mu lituuli lye babaandu boosi.

¹⁹Ukhalekha baasiku baase baakhupaka ise kamayino ta, nga bebuyila bari lwekhuuba ise naawulibwile ta. Naluundi ukhalekha abo babaambiiyila ise akhali ilomo yoosi ta, khukhuuntsomiisilakho ise tsimoni nga bekhoya ta.

²⁰Lwekhuuba nibo sibakanikha bilomo bye buusaale ta, ne bayiiya bilomo bye bubeeyi khu baandu babaakana lukoosi.

²¹Baanomela tsilomo tse khukhuumbaabila nga bayokesela angaaki bari, “Khwaaboone byeesi iwe wakhola, naluundi tsimoni tseefwe tsaabiboone!”

²²Ne iwe bino byoosi wabibona, O Umukasya. Nashiryo ukhasila busili busa ta! O Umukasya, ukhambeela aleeyi ta!

²³O Umukasya, niwinyukhe usoolanile ise, ni undimilile ise, O Wele wase luundi uli Umukasya wase!

²⁴O Umukasya, iwe nga n'uli uwa ŋali, niwokesanise uri ise siindikho ni kumusaango ta. Naluundi ukhalekha baasiku baase khukhuuntsinyayilakho busa baryo ta.

²⁵Ukhabalekha baloma bari, “Aso, bona ari khwafunile sheesi khwakana! Uyo ari khwaamumaliilewo ilala!”

²⁶Abo boosi babekhoyela kumutaambo kwase khali ubakosaasile, bawaambisibwa tsisoni! Ni naabo babantsiwulililakho khali baswaalile baweelawo ilala.

²⁷Ne lekha abo babaanganisa ise khuuba buulayi bekhoye luundi bayokesele angaaki ni kumwikhoyo. Naluundi lekha balome busheele bari, “Umukasya nga ali mukhulu! Ekhoya khubona nga umwakaanisi weewe ali mu bulamu buulayi!”

²⁸Nio nase lwanyuma imboolele buli mutweela khu bye bukwalaafu bwoowo, naluundi ikhuruuye iwe biifukhu byoosi.