Read lumasaaba Tsizabuli 36 Bible Online

Tsizabuli 36 - lumasaaba bible

Tsizabuli 36

¹Shiibi shikanikhila mukari mu mwoyo kw'omwoonaki. Umwoonaki s'afukiilila ari Wele aliwo ta, naluundi s'amurya na khafwiiti ta.

²Lwekhuuba umuundu ufwaana aryo eyiinga mu moni tseewe umweene, aryo ambaasa ari Wele singene afuumbule bibyoonako byeewe luundi amubiyiise ta.

³Byoosi byeesi akanikha bili biibi byonyene luundi bili bye bubeeyi; waayakamisa khuukhola bibiindu bye kamakesi naluundi bibiili biilayi.

⁴Umwoonaki nga waakonele aasi ambaasa khuukhola bye bubwoonaki byonyene; waayiyomiisila ilala musaambo tseewe tsiimbi, naluundi mbaawo shiibi sheesi niye akhakhola ta.

⁵O Umukasya, khuukana khwoowo khukhuukhakama ta, khwoola ni mwikulu, ni bubwiyikinwa bwoowo bumalatana ni mu ngaaki mwoosi.

⁶Bukwalaafu bwoowo buli angaaki nga tsinjiinji tsindeeyi, ni khuukhala khwoowo khwe kimisaango khwikhila ilala aasi nga shisiba shileeyi naabi. O Umukasya, iwe niye ulolelela babaandu ni tsisolo tseene.

⁷O Umukasya, khuukana khwoowo khukhuukhakama ta nga khubiririfu! Babaandu banyoola bubwilukhilo mu shisiisa she tsindaha tsoowo.

⁸Balya luundi bekura buulayi byeesi iwe ubawa bibyaama mu ntsu yoowo. Iwe ubalekha baanywa kameetsi kakaama mu luutsi lwe buulayi bwoowo.

⁹Lwekhuuba mwiiwe nimwo mumuuli isebele iye buulamu; ni mu buwaanga bwoowo nimwo mweesi nafwe khubonela buwaanga.

¹⁰Aso, iwe ni wiloosele khukhwookesa khuukana khwoowo khukhuukhawawo ta, isi abo babaakhumanya iwe, ni khuukholela abo babaali ni kimyoyo kimikwalaafu bibiindu biilayi.

¹¹Ukhafukiilila babaandu be shikili, babeyiinga baantsibwakala ise ta, namwe ukhafukiilila baboonaki khukhuumboona baandusa ise mu shifo shase ta.

¹²Bona nga isi baboonaki ni bakwiile aasi! Bakhupibwile aasi nga sibanyala ni khukhwinyukha luundi ta.