Read lumasaaba Tsizabuli 37 Bible Online

Tsizabuli 37 - lumasaaba bible

Tsizabuli 37

¹Iwe ukhawamo kamaani khu lwe babaandu babaali baabi ta, namwe libuba likhakhuwaamba khu lwaabo babaakhola buubi ta.

²Lwekhuuba baliwawo khaangu nga bunyaasi ni bwooma, baliifwa nga bimiitswa bibiniaala byaafwa.

³Iwe niwiyikiinatsake Umukasya naluundi ukholatsake buulayi, nio umenyatsake mu lukoosi khu shibala.

⁴Kumwikhoyo kwoowo n'ukuweentsele mu Mukasya, ni naye kane akhuwe iwe byoosi byeesi kumwoyo kwoowo kukana.

⁵Iwe ni wihaaneyo mu mikhono ky'Omukasya; n'umwiyikine ni naye kane akhuyeete iwe.

⁶Kane Umukasya akhole bukhosefu bwoowo bumulikhe, bwaaburukhe nga kumuumu kwe mwihangilwe.

⁷N'uliindilile ni khukhwikhalilikha mu moni ts'Omukasya; nga uliindiilila niye sheesi kane akhukholele iwe. Ukheyembelela khu lwaabo babaaba buulayi ta, namwe libuba lyakhuwaamba khu lwaabo babefunila bibyaabwe khubirira mu mbomelo tsaabwe tsiimbi ta.

⁸Iwe n'ulekhatsake lirima ni khukhwikhalalisaka! Naluundi ukheyembelela ta, lwekhuuba mbaawo shilayi shishibyaamamo ta.

⁹Khulwekhuuba abo babaakhola biibi baliwonebwa balurewo, ne abo babeyikina Umukasya baliifunila babeene shibala shishiili shishaabwe.

¹⁰Itaambayo mbuka ifwiiti iri babaandu baabi bawewo; waakhalibaweentsa mu shifwo mweesi babeele, s'ulibanyoolamwo ta.

¹¹Ne bawolu mu myoyo balifuna shibala nga buusikha bwaabwe, bekhoyele mu buyiindifu bubiririfu mu lukoosi.

¹²Umuundu umubi akuta umuundu umulayi nga amulolelela ni lirima liikali.

¹³Ne Umukasya atsekhelela umuundu umwoonaki, lwekhuuba amanya ari imbuka yeewe yaamuweelekho.

¹⁴Buli muundu umwoonaki atsoolayo lurima lweewe, wayiinga buyiingo bweewe khuukana khukhwiira bataambi ni babaakhenyala ta, ni khuumalawo abo babaakhola buulayi.

¹⁵Ne buli lurima lw'omwoonaki lulimuwuna umweene, ni buyiingo bweewe bulifunikhaka.

¹⁶Bibiindu bikyeekhe byeesi umuundu umulayi aba ni nabyo bifuura buyiindifu bweesi baboonaki baakali baba ni nabwo.

¹⁷Lwekhuuba Umukasya alimalawo kamaani ke baboonaki, ne aliinde abo babaali balayi.

¹⁸Umukasya alolelela abo babaakhalikho ni shiibi ta, ni busikha bwe shibala buliba bubwaabwe biifukhu byoosi.

¹⁹Bakhosefu singene babe buubi mu biifukhu bihangafu ta, ni mu biifukhu bye ntsala kane balyatsake bekure.

²⁰Ne baboonaki baliihela; ni baasiku b'Omukasya balyooma bawewo nga bimuli bye mwirome; baliwawo busa nga lisuusi ni liwawo.

²¹Umwoonaki ewola, ne s'akobosayo byeesi ewolile ta, ne Umuundu umulayi akhola bye shiisa nga ahaana biwaano.

²²Abo beesi Umukasya awa tsikhabi balifuna shibala nga buusikha bwaabwe, ne abo beesi niye atsuba, baliihela.

²³Umukasya araangirira umuundu mu mukhoosi kweesi niye akana umuundu uyo atsyemo, naluundi ayilisa abo babaamwikhoyesa.

²⁴Abe umukhosefu akhakwa aasi, s'aramawo ta, lwekhuuba Umukasya amwinyusa ni kumukhono kweewe.

²⁵Ari ise naakorere, naahangaale mu miiko, ne ise ishiili khubonakho umuundu umulayi bari Umukasya waamwaantsukhile ta. Namwe bari babaana beewe basabilisa bye khuulya ta.

²⁶Umuundu umulayi ahaana ni kumwoyo mutweela biifukhu byoosi, ni babaana beewe bamwikhoyesa.

²⁷Iwe umuundu umwoonaki n'urure mu bwoonaki, ukholatsake bibiindu biilayi, ni nawe uryo uliba ni buumenyo bwe biifukhu byoosi.

²⁸Umukasya niye akana bye bwa ŋali, ni naye aryo s'antsukha bakhosefu beewe ta. Niye abaliinda biifukhu byoosi, ne lisaaye lye baboonaki liliihela.

²⁹Bakwalaafu balifuna shibala nga buusikha bwaabwe, luundi balishimenyakho biifukhu byoosi.

³⁰Umuundu umukwalaafu akanikha bilomo bye kamakyesi, naluundi akanikha bye bwa ŋali.

³¹Niye aliinda kamakaambila ka Wele weewe mu mwoyo kweewe, naluundi s'akalekha ta.

³²Umuundu umwoonaki ebuulila umuundu umulayi, nga aweentsa kamakyesi ke khuumwiira.

³³Ne Umukasya s'alilekha umuundu umulayi mu bunyala bw'omuundu umwoonaki uyo ta. Namwe Umukasya s'amulekha baamukhalila kumusaango kwaamufuura singa bamureera khuumuwotsesa ta.

³⁴Iwe n'uwiyikine Umukasya, uwulilatsake kamakaambila keewe, ni naye alikhuwa iwe shiriifwa nga akhuwa shibala khuuba shishoowo. Ni nawe ulibona baboonaki nga ni bahela.

³⁵Ise nabona umwoonaki nga ali ni buunyala buukali bwe khuulekelesa buli mutweela, nga wetukhuumile nga kuusaala kuuleeyi kukwatsowa khu liiloba liilayi.

³⁶Ne lwanyuma ise ni nabirawo luundi, nabona nga umwoonaki s'ashiiliwo ta. Ikhaba nga namuweentsa, ne sinamubonakho luundi ta.

³⁷Iwe niwofwaase umuundu ukhalikho shiibi ta, ulole umuundu umukwalaafu, lwekhuuba umuundu umukwalaafu aba ni lisaaye liliiloosela.

³⁸Ne baboonaki boosi atweela baliihela, ni lisaaye lyaabwe lyoosi liliweelawo ilala.

³⁹Umukasya awonesa babaandu bakwalaafu, naluundi abaayilisa mu mbuka iye bikosi.

⁴⁰Umukasya abayeeta naluundi waabawonesa, abawonesa khukhwaama isi baabi, lwekhuuba belukhila isi ali khuubaliinda.