Read lumasaaba Tsizabuli 38 Bible Online

Tsizabuli 38 - lumasaaba bible

Tsizabuli 38

¹O Umukasya, ukhaantsikiitsa ise nga uli mu lirima lyoowo ta, namwe ukhaamba ise shitaambiso nga uli umukhalafu ta.

²Iwe waambunakile ise ni buyiingo bwoowo, waakhupile ise naakwiile aasi.

³Lwe lirima lyoowo, ise niwulila butsiina bukali, ni kumubili kwase kwoosi kwalwaalile lwe bibyoonako byase.

⁴Bibyoonako byase byaasitoweele ise luukali, ni busiro bwabyo bwaamiinile ise naabi.

⁵Khulwe busilusilu bwase, kamakoontsyo kaase kaabolele luundi kalikho kawunya.

⁶Ise naafunikhakile, naakwisibwile aasi, injeenda nga nindila khukhwoolesa antsye ni bwilabula.

⁷Ise netsuulemo khukhwookhelela khwe kamayima, ni mu mubili kwase mbaamo bulamu ta.

⁸Ise naafunikhakile luundi naaweelelemo ilala kamaani, ikholaka shiisa lwe butsiina bubuuli mu mwoyo kwase.

⁹O Umukasya, byeesi ise ingana byoosi iwe waabimanya, iwe uwulila khuulenya khwase khwoosi.

¹⁰Kumwoyo kwase kukhupa naabi, kamaani kambweelemo, ni tsimoni tsase sitsishibona ta.

¹¹Basaale baase ni babesanwa baase bantsiyawukhilekho, khulwe kamakoontsyo kaase, ni baalebe baase baantsilukhilekho.

¹²Abo babaakana khukhuuntsira ise baandekile kimireko, ni naabo babaanganisa ise buubi baandiisariisa ni buurafu.

¹³Ne ise nafwaana busa nga umumiinyi ukhawulila byeesi baloma ta, naluundi ise naafwaana busa nga wawuma ukhanyala khuukanikha ta.

¹⁴Ilala ise ndi busa nga umuundu ukhanyala khuuwulila ta, naluundi ukhanyala khukhwiilamo ta.

¹⁵Ne ise ikhwiyikina iwe, O Umukasya, O Wele wase; iwe niye ukane antsilemo ise.

¹⁶Ikhuloomba ndi iwe ukhafukiilila baasiku baase khukhuuntsikhoyelakho ta, namwe ukhabafukiilila khukhwibuyila nga ise naakwiile ta.

¹⁷Ise ndi aambi khuukwa, ni butsiina bwase bwaantsiniaaliilisile.

¹⁸Ise nibiiyisa bibyoonako byase, luundi nibiiyisa lwe khukhwoneka khwase.

¹⁹Baasiku baase bali baalamu buulayi luundi be kamaani, ni naabo babaambiiyila ise akhali ilomo yoosi ta, bali baakali.

²⁰Abo babaandiyila ise buubi lwe biilayi byeesi ise imbakholela, nibo baasiku baase. Lwekhuuba ise ikhakakho khukhola biilayi.

²¹Ukhaandekha ise ta, O Umukasya! Ukhaba aleeyi ni nase ta, O Wele wase.

²²Yuubakho unjeete ise, O Umukasya, O Umuwonesi wase!