Read lumasaaba Tsizabuli 39 Bible Online

Tsizabuli 39 - lumasaaba bible

Tsizabuli 39

¹Ise naloma ndi, “Kane nitsiliilisatsake mu byeesi ikhola byoosi, indekhe khukhwooneka ni lulimi lwase ta; ise singene inome ilomo yoosi khukhwaama mukhanwa mwase, nga baboonaki bali aambi ni nase ta.”

²Ise nasila busa, naalekha khuloma ilomo yoosi ta, ikhaba biilayi ise sinabikanikha ta, ne kumutaambo kwase kweloosela.

³Indyo ise neyembelela, nga nineloosela khukhwaambaasa, ni kumutaambo nakwo kweloosela. Kila ise nakyelawo naaloma ndi:

⁴“Umukasya, n'umanyise ise lweesi indifwiila, ni buuleeyi bwe biifukhu byase. N'umboolele liina buulamu bwase lweesi bulyakamila!”

⁵Bona, iwe wakhola biifukhu bye buulamu bwase khuuba bikyeekhe, ni biifukhu bye buulamu byeesi ise ndimala, bibonekha nga mbaamo shiindu ta mu moni tsoowo. Ilala buli muundu ali busa nga kumuukha.

⁶Buli muundu abirawo bubiri nga shishiniini! Byoosi byeesi akholela mu khurekana akholela busa! Abuunga buyiindifu ne nga s'amanya naanu ukane abuyile ta.

⁷Ni ana ari, O Umukasya, shiina sheesi ise niyikina? Kumwiyikino kweesi ndi nakwo kuli mus'iiwe.

⁸N'umbonese ise khukhwaama mu byoonako byase byoosi, iwe ukhaandekha ise naaba she khuutsekhelelwa isi baasilusilu ta.

⁹Ise kane isile busili busa, singene inome ilomo yoosi ta, lwekhuuba iwe wamweene niye uwuntsiinisile ise uryo.

¹⁰Iwe ukheloosela khukhuumbonabonisa ise ta, lwekhuuba ise ndi aambi ni khuufwa khulwe buukhupe bwoowo.

¹¹Iwe ni wikiitsa umuundu nga umubiiyisa khulwe khukhwooneka khweewe, umumalilamo ilala buulayi bweewe bwafwaana nga bubuliilibwile ni tsisilili. Ilala buli muundu ali kumuukha busa.

¹²N'uwulile khuuloomba khwase, O Umukasya, urekeerese khuulila khwase. Ukhasila busili busa nga ise ikhulilila iwe ta! Ise ndi umuwuuyi busa is'uli, wubirawo busa luundi umukyeendaani, wutsya busa nga bakuuka baase boosi ni baatsya.

¹³N'untsikhalilikhekho khakyeekhe, manya ise naasangaalakho nga ishiili khurura khu shibala ta.