Read lumasaaba Tsizabuli 4 Bible Online

Tsizabuli 4 - lumasaaba bible

Tsizabuli 4

¹O Wele, n'untsilemo nga naakhuloombele, Iwe uli umuliindi wase. Ise ni naba mu bukosi, iwe wanjeeta. N'umaambile shiisa ari, uwulile khuuloomba khwase.

²Inywe babaandu mulyoolesa eena khuulekha khuntsisamo ise shiriifwa? Mulyoolesa eena khuukana bibiindu bibikhalimo kumukaso ta, ni khuuloondelela bye bubeeyi?

³Ne inywe ni mushebulile muri, Umukasya waaroboole abo babaamukana khuuba babaandu beewe. Ni naye ambulila ise nga naamwilootseele.

⁴Inywe nimunikine khulwe khuurya, naluundi mwaakamise khukhwoonaka khweenywe; shino mushambaasekho naabi mu myoyo kyeenywe nga mwaakonele mu bulili bweenywe.

⁵Muwaaneyo biwaanwa bibyaakhila isi Umukasya, naluundi mumwiyikine niye.

⁶Iliwo baakali babaaloomba bari, “O Umukasya, n'ukhuwe tsikhabi tsitsiindi! Ukhwaburusile buwaanga bwe shiisa shoowo!”

⁷Wambeele ise kumwikhoyo kumukali mu mwoyo kwase, kufuurisa ni kumwikhoyo kweesi baalala bafuna mu musalo kwaabwe kwe biilyo ni viini.

⁸Ari ise kane niyalise aasi naluundi ingone liilo mu lukoosi, lwekhuuba iwe Umukasya, iwe wenyene niye uwuniinda ise naaba mu lukoosi, nio naalekha khurya ta.