Read lumasaaba Tsizabuli 40 Bible Online

Tsizabuli 40 - lumasaaba bible

Tsizabuli 40

¹Ise nekhalilikha naaliindilila Umukasya khukhuunjeeta; ne lwanyuma aandekereesa ise waawulila khuulila khwase.

²Aryo Umukasya waakhweesa ise waandusa mu lilowo lileeyi, mu litosi lye khuuhela. Aryo ndi waanda ise khu lwaanda khweesi imenya nga indi umulamu, bikyele byase waabihandalasila isi niimile.

³Waandeekela ise khukhwiimba kumweenya kumushaakha, kumweenya kwe khuuruuya Wele weefwe. Bakali ni balibona shino bakhaarye, barakikhe khukhwiyikina Umukasya.

⁴Ali ni tsikhabi umuundu uwiyikina Umukasya, uyo ukhatimaka isi babeyiinga ta, namwe waatubaana ni naabo babesaaya ba wele be bubeeyi ta!

⁵O Umukasya Wele weefwe, bye kamakaanga byoowo byeesi ukhukholela ifwe nga biikali! Mbaawo ukuundi uuli nga iwe ta! Ise imba nga ukhakilekho khuubibala namwe khuubikanikhakho, nga biikali sibibalikha ta!

⁶Iwe tsisaayilo tsintsoshe ni bibiwaanibwayo iwe s'ubikana; iwe s'uloomba uri bakhureerere bisolo bibyookhebwela khu sheeso nga bili bibuufu, namwe waaloomba uri bakhureerere tsisaayilo lwe bibyoonako ta. Khuurusakho ndi wambeele ise kamaru ke khuuwuliilisa iwe.

⁷Isho shaakila ise nelamo ndi, “Ise niyooyu, netsile khukhola sheesi bilomo bibinganikhakho khusiise, bibyaronebwa mu shitabo she kamakaambila nga ni biloma biri;

⁸‘O Wele wase, nga ise nikhoyela mu khukhola byeesi iwe ukana, naluundi ise iniinda kamakaambila koowo mu mwoyo kwase.’ ”

⁹Akari mu lubusano lwe babaandu boowo, ise narumbula kamakhuuwa kamalayi nga ni wakhuwonesa ifwe. Ni nawe, O Umukasya, washimanya uri sinayakamisa khushikanikhakho ta.

¹⁰Ise sinasila busa naalekha khu shiboolela babaandu boowo nga ni namanya ndi iwe wakhuwonesele ifwe ta. Ise naruumbula bubwiyikinwa bwoowo ni buwonesi bwoowo. Nga ndi akari mu lubusano lwe babaandu boowo, ise naakhusilatsakakho busa ta, khuuboolela babaandu khu khukana khwoowo khukhuukhawawo ta, ni bubwiyikinwa bwoowo.

¹¹Umukasya, ukhaakamisa khuuba uwe shiisa isi ise ta, khayo shiisa shikali ni bwa ŋali bwoowo biniindile ilala ise busheele.

¹²Bukosi bukali bubukhanyala khuubalikha ta bwaantsibotokheleele ise. Bibyoonako byase byaafuurire ise kamaani, ni khuubona ise sinaanyalisile khuubona ta; khuubibala byoosi bili biikali bifuura ni litsuune lye khu murwe kwase; ni kamaani ise kambweelemo.

¹³O Umukasya, n'ufukiilile khukhuumbonesa ise! O Umukasya yuubakho unjeete ari!

¹⁴Khayo abo boosi babaakhakakho khukhuuntsira ise baswaale luundi basalanisibwe; abo boosi babekhoya lwe bukosi bweesi ise ndimo beesibwe inyuma nga baswaalile.

¹⁵Khayo abo boosi babaantsekhelela ise babe ni khuurya naluundi baswaale.

¹⁶Ne khayo abo boosi babaakhwisaaya iwe bekhoye luundi benyayile mwiiwe! Abo babaakhusiima iwe lwe buwonesi buli busheele balomatsake bari, “Umukasya ali umukhulu naabi!”

¹⁷Ne ise khulwase ndi mutoro, luundi ndi umutaambi, ne Umukasya antsambaasakho. Iwe niye umuyeeti wase, luundi iwe niye uwumbonesa ise, O Wele, n'undimiliile khaangu unjeete.