Read lumasaaba Tsizabuli 41 Bible Online

Tsizabuli 41 - lumasaaba bible

Tsizabuli 41

¹Ali ni khabi umuundu uwinaanayo isi bataambi! Umukasya alimuyeeta nga naye ali mu mbuka iye bukosi.

²Umukasya amuliinda, waamuwa buulamu; waamukalusa khuuba uwe tsikhabi mu shibala; naluundi s'amulekha waakwa mu makhono ke baasiku beewe ta.

³Umukasya amuyeeta nga ali umulwaale, waamuwonesa khukhwaama mu butsiina bweewe bwoosi.

⁴Iseese naloma ndi, “O Umukasya, naayonaka luukali mu moni tsoowo, n'umbonese lwe shiisa shoowo.”

⁵Baasiku baase baanomakho ise buubi, nga baloma bari: “Aliifwa liina bamwiibilile?”

⁶Abo babeetsa khukhuumbona ise, bakanikha bilomo bye bubeeyi; mu myoyo kyaabwe behentsela bye buubi byonyene, nio nga baarurire ibulafu baatsiile, baabisalanisa buli aandu.

⁷Abo boosi babaambiyila ise baanganikhakho nga baanguta; baantsambaasa khusiise biibi byonyene.

⁸Baloma bari, “Waalwaalile buulwaale buubi naabi bweesi akhanyala waawona ta; ni isi akonele singene anyale khukhwinyukhawo ta.”

⁹Ikhaba n'umusaale wase umweene isi ise niyikinila ilala, isi ise ndya ni naye, wekyelile umusiku wase uwundyamo ise luwomelo.

¹⁰Ne iwe, O Umukasya, n'umaambile ise shiisa, ungobosemo kamaani, nio nase niliyaase baasiku baase.

¹¹Lwashino ise kane manye ndi iwe ungana; lwekhuuba baasiku baase singene baambule ise ta.

¹²Iwe wamaambiilile ise lwekhuuba ikhola bibiindu bikwalaafu. Waayiniindila ise mu moni tsoowo biifukhu byoosi.

¹³O Umukasya Wele wa Isiraeli uruuyibwe biilo ni biilo! Amiina naluundi Amiina!