Read lumasaaba Tsizabuli 42 Bible Online

Tsizabuli 42 - lumasaaba bible

Tsizabuli 42

¹Nga ikhisi ni ietsaeetsa nga yiwuuma kameetsi kamanyire, ni nase ndyo ikhwiwuuma iwe, O Umukasya.

²Buulesa buundya ise mu mwoyo kwase khulwoowo, O Wele, iwe Wele umulamu. Ari ise ndiitsa liina khukhwisaaya mu moni tsoowo?

³Ise ndila kamasika kumuusi ni mu shilo, ni kamasika kaase kayikyela niko biilyo byase. Khulwekhuuba buli mbuka baasiku baase bandeeba ise bari, “Wele woowo ali waheena?”

⁴Bibiindu bino byoosi ise imbishebulila nga ndi ni kumutaambo kumukali. Ise ishebulila nga ni natsyatsaka ni kamatuuli, nga inaangilila lubatsaangwa khuutsya mu ntsu ya Wele, ni kimyeenya kye kumwikhoyo ni khuusiima, bye khuuruuya Wele.

⁵Lwashina kumwoyo kwase kwiyembelela? Lwashiina ise kumutaambo kukana khukhuuntsira? Khayo kumwoyo kwase kure kumwiyikino kwakwo mu Wele, lwekhuuba ndi luundi kane ise imbuyile umuwonesi wase naluundi uli Wele wase.

⁶Kumwoyo kwase kweyembeleele, nashiryo kane ise ikhushebulile iwe nga ndi mu shibala sha Yorudaani, nga indi khu ngoongo tsa Herumoni, ni khu lukiingi Mizari.

⁷Iwe waasiindikhiile ise kumutaambo kukuuli busa nga khuulyebukha khwe kameetsi khwe kamaani, ni khukhwilyebula khwako byamimbilila ise.

⁸Mu mbuka iye kumuusi, Umukasya okyesanisa khuukana khweewe khukhuukhakama ta, ni mu shilo ise imwiimbila niye kumweenya, nga nikhwo khuuloomba khwase isi Wele we buulamu bwase.

⁹Ise nareeba Wele uli Lulwaanda lwase ndi, “Lwashiina iwe wantsibiliila ise? Lwashiina ise injeenda nga indila khulwe khumiinilisibwa khukhwaama isi baasiku baase?”

¹⁰Niwulila nga naaweetsekheleele naabi lwe bukhomo bwaabwe, lwekhuuba baasiku baase bandyaabila nga bandebelesa bari, “Wele woowo ali waheena?”

¹¹Lwashiina kumwoyo kwase kuweelemo kamaani? Lwashiina ise ikhali khukhwiwulila buulayi? Kane ise inde kumwiyikino kwase mu Wele, imuruuyatsake lwekhuuba niye ali umuyeeti wase naluundi ali Wele wase.