Read lumasaaba Tsizabuli 44 Bible Online

Tsizabuli 44 - lumasaaba bible

Tsizabuli 44

¹O Wele, ifwe fwabeene khwawulila ni kamaru keefwe nga bakuuka beefwe bakhuboolela ifwe, bibiindu byoosi byeesi iwe wabakholela mu biifukhu byaabwe, mu biifukhu bye khaale akho.

²Iwe wamweene watimisa kamanaambo khurura mu liloba ilyo, nga uraambisa kumukhono kwoowo kwe kamaani. Uryo iwe waminiaangula babaandu baamwo, wenjisamo bakuuka beefwe. Ni bakuuka beefwe iwe wabalekha baabalaayila mu liloba ilyo.

³Babaandu boowo sibaawula shibala isho nga baraambisa kamaani kaabwe babeene ta, naluundi akhuba khulwe bunyala bwaabwe babeene ta. Ne yaba khu lwe kumukhono kwoowo kwe kamaani, ni bunyala bwoowo, ni buwaanga bwoowo bubwookesanisa nga iwe n'ubakana nibo.

⁴Iwe uli Umuyiinga wase luundi uli Wele wase, uwaha babaandu ba Yakobo kamaani ke khuuwula baasiku.

⁵Khulwe kamaani koowo, ifwe khuwula baasiku beefwe; khulwe lisiina lyoowo ifwe khusaambakilila abo babaakhuraangana ifwe.

⁶Ise siniyikina buyiingo bwase ta, namwe lurima lwase silunyala lwambonesa ise ta.

⁷Ne iwe ukhuwonesa ifwe khukhwaama khu baasiku beefwe babaakhubiyila ifwe. Iwe ubawula, baryo baswaala busa.

⁸Nga khuli mu Wele weefwe, ifwe khwibuyila busheele, naluundi khuruuya lisiina lyeewe biilo ni biilo.

⁹Ne ari bona iwe waakhulekhile ifwe luundi waakhwisile ifwe aasi. Iwe s'ushiitsya ni kamaye keefwe mu busoolo ta.

¹⁰Iwe waakilile ifwe khwaatitukhile khukhwaama isi baasiku beefwe, ni baasiku beene baakhuyililekho ifwe bibiindu byeefwe.

¹¹Iwe waakhuwaanileyo ifwe khwaafwaana nga kamasheese kakaatsya khukhwiiribwa, naluundi iwe waakhusalanisile ifwe mu manaambo kakaandi.

¹²Iwe wakulisa babaandu boowo waafunamwo khakhaandu khakyeekhe khari. Iwe wakhuwaanayo ifwe isi baasiku, khwaafwaana nga babaakhalimo kumukaso ta.

¹³Iwe waakhwikyelisile ifwe bukhomo isi babesanwa beefwe, abo babaamenya aambi ni nafwe, abo bakhulekelesa ifwe luundi bakhutsekhelela ifwe busa.

¹⁴Iwe waakhwikyelisile ifwe busa nga luukano mu manaambo, ni babaandu basisiikha busa kimirwe kyaabwe nga baakhuboonekho ifwe.

¹⁵Buli shifukhu ise niwulila kumutaambo, naluundi ise tsisoni tsaamaambile naabi,

¹⁶khulwaabo babaantsekhelela ise naluundi baantsintsiina, khulwe baasiku baase babeweeleyo khukhuuntsiinisa ise.

¹⁷Bino byoosi byaakhwoolelekho khusiifwe, akhaba nga ifwe sikhwaakhwibilila iwe ta. Namwe ifwe khwaakhufuniaakakho indakaano isi ifwe khwakhola ni nawe ta.

¹⁸Ifwe mu myoyo kyeefwe khwaakhukhuuminyaalilakho iwe ta, namwe khwaarura mu mikhoosi kyoowo ta.

¹⁹Ne iwe waakhufuniaakakile ifwe waakhuyiliile atweela ni tsisolo tse mwirome, waakhulekhile ifwe mu shiilima namukoto.

²⁰Ifwe khuba nga khukhwebilila lisiina lya Wele weefwe, namwe khuba nga khukhwaloomba isi ba wele babaandi,

²¹khali iwe nga Wele weefwe akhushimanyakho ta? Lwekhuuba iwe waamanya bimoonyo bye mu mwoyo.

²²Khulwekhuuba ifwe khuli baloondeleli boowo, ifwe khuli mu bukosi bwe khuufwa shifukhu shoosi, khuyilibwa nga kamasheese kakaatsya khukhwiiribwa.

²³N'usisimukhe, O Umukasya. Lwashiina iwe ukona liilo? Yinyukha! Ukhakhwaantsukha ifwe biifukhu byoosi ta!

²⁴Lwashiina iwe wibiimbilila mu moni mwoowo, waalekha khukana khubona kumutaambo kuno ta? Lwashina iwe wibilila khuutaambisibwa khweefwe ni khuumiiniliisibwa khweefwe?

²⁵Ifwe khwaakwiile aasi mwifukhuulu khwewunamiile; kimibili kyeefwe kyewaambile khwiloba aasi.

²⁶Yinyukha, yiitsa ukhuyeete ifwe! Khuwonese ifwe lwe khuukana khwoowo khukhuukhakama ta.