Read lumasaaba Tsizabuli 45 Bible Online

Tsizabuli 45 - lumasaaba bible

Tsizabuli 45

¹Kumwoyo kwase kwetsuulemo bilomo biilayi, nga ise ni neemba kumweenya khulw'Omuyiinga. Lulimi lwase lufwaana busa nga ikalaamu iy'omuroni umulayi.

²Iwe ubonekha buulayi mu basaani boosi; ni bilomo bye mukhanwa mwoowo bili bye bubweela; lwekhuuba Wele wakhuwa iwe tsikhabi biifukhu byoosi.

³Iwe umuwuli uwe kamaani, ni wibowe lurima lwoowo khu nduukhu, n'ukwaare shiriifwa shoowo ni bukhulu bwoowo.

⁴Mu bukhulu bwoowo iwe n'utsye nga umuwuli lwe khuuliinda bwa ŋali, buwolu ni bukwalaafu. Nga uraambisa kumukhono kwoowo kwe kamaani, iwe ulyokesanisa buraambi bwe kamaani naabi!

⁵Siindikha buyiingo bwoowo buumeme buwuluse mu myoyo kye baasiku b'omuyiinga; ni kamanaambo koosi kakwe aasi e bikyele byoowo.

⁶Shitsoloŋo shoowo sheesi Wele akhuweele iwe, kane shibewo biilo ni biilo, ni buuwuli bwoowo buli buwuli bwe bukwalaafu.

⁷Iwe ukana bukwalaafu, ne waabiyila bubwoonaki. Nashiryo iwe, Wele woowo uyo waakhuroboole iwe khuuba angaaki e bashoowo, nga akhuwakha iwe kamafura ke kumwikhoyo kukufuurawo.

⁸Bikwaaro byoowo byoosi biwunya buulayi lwe bye khuuwunya buulayi bibikhali bitweela ta, ni kimyeenya khukhwaama mu matuungu ke mu lubili lwe shiriifwa she angaaki kikhwikhoyesa iwe.

⁹Mu bakyelama be shiriifwa boowo mulimo bakhaana be bayiinga. Khu mukhono kwoowo kumulayi khwemikhilekho nabakyelama ukwaarire izaabu indayi.

¹⁰O iwe umukhaana w'omuyiinga, wuliilisa sheesi ise inoma; yibilila babaandu boowo, ni baalebe be mu ntsu ya paapa woowo.

¹¹Ni khuubonekha khwoowo khuulayi kane khukile umuyiinga akhukane iwe naabi, n'ukhole byeesi akana lwekhuuba niye ali umukoosi woowo.

¹²Babaandu bayindifu be Tuulo balikhurereera iwe biwaanwa khuukhukhoongelesa iwe.

¹³Umukhaana w'omuyiinga uuli mu lubili, nga abonekha buulayi naabi! Bikwaaro byeewe byaruungibwakho ni zaabu.

¹⁴Nga wakwaarire shikwaaro shiibiriirifu naabi, bamuyila w'omuyiinga; nga arongesebwakho ni bakyeesa ni basaale beewe.

¹⁵Buli mutweela nga wetsuule kumwikhoyo ni sangaalo nga beetsa benjila mu lubili lw'omuyiinga.

¹⁶Babaana boowo besooleli baliyila shiifwo she ba paapa boowo, beele mu bikyele bye bakuuka boowo nga bayiinga, ubekyelise khuuba bawuli mu shibala shoosi.

¹⁷Ise ikhaafumise lisiina lyoowo mu miboolo kyoosi; ni kamanaambo koosi kalikhuruuya iwe biilo ni biilo.