Read lumasaaba Tsizabuli 46 Bible Online

Tsizabuli 46 - lumasaaba bible

Tsizabuli 46

¹Wele niye bubwilukhilo luundi niye kamaani keefwe, niye umuyeeti uuli uwa khaangu khuukhuyeeta ifwe nga khuli mu bikosi.

²Ni nashiryo, ifwe singene khurye ta, abe shibala shakhesiisiikha shirye, namwe abe shakhayeŋaana, namwe tsinjiinji tsakhaashuukha tsaakwa iyo aleeyi mu nyaantsa;

³namwe abe kameetsi mu nyaantsa kakhaayilila keetsula lifulo, ni tsinjiinji tsaatengaasibwa lwe khuuyilila khwe kameetsi.

⁴Iliwo luluutsi luluureera kumwikhoyo mu shiriimba sha Wele, khu ntsu ikhosefu iy'oyo Uuli Angaaki Lukali.

⁵Wele ekhala akari mu shiriimba isho, nashiryo sishilinikinisibwa ta; Niye umweene kane ashitimilile nga bushiili.

⁶Wele n'arusa likono lyeewe nga akanikha, kamanaambo keyembelela, ni buyiinga buyeŋanisibwa, ni shibala shaayengukhaka.

⁷Umukasya uwe kamaani ali ni nafwe, Wele wa Yakobo niye bubwilukhilo bweefwe.

⁸Ni mwiitse mulole, mubone buraambi bw'Omukasya, mubone bye khukhwiyaangisa byeesi akholile khu shibala.

⁹Niye akamisa busoolo mu shibala shoosi, afuniaakaka buyiingo, akhaba kamafumo nako akafuniaakaka, ni kamakaali keesi baraambisa mu busoolo niye waakoosha ni kumulilo.

¹⁰Luundi Umukasya alakila ari, “Inywe ni muwoleele, mumanye muri ise niye Wele, uuli umukhulu akari mu manaambo, ni mu shibala shoosi.”

¹¹Umukasya uwe kamaani ali ni nafwe, Wele wa Yakobo niye bubwilukhilo bweefwe.