Read lumasaaba Tsizabuli 48 Bible Online

Tsizabuli 48 - lumasaaba bible

Tsizabuli 48

¹Umukasya ali Umukhulu naabi, niye aakha khuruuyibwa naabi, mu shiriimba sha Wele weefwe! Khu lukiingi lweewe lukhosefu,

²lukiingi lumiliwu lulubonekha buulayi, lulureera kumwikhoyo isi shibala shoosi. Lukiingi Sayuuni lukhosefu nilwo shiriimba sh'Omuyiinga Umukhulu.

³Mu lumako lwe shiriimba isho, Wele weyokesaane nga niye n'ali umuliindi uwelala.

⁴Ne bayiinga ni baabuusana atweela, nga batsya khushibwakala,

⁵babona shino baarya na khurya nga beyaanga, baatitukhawo.

⁶Abweene awo buuri bwabawaamba, ni khuutsiinikhana nga umukhasi isi umwaana alya.

⁷Iwe ubafuniaakaka nibo nga imbewo iyaama ibwaamanyaanga ni iwuutsa yaafuniaakaka tsimeeri khu nyaantsa.

⁸Nga ifwe ni khuwuliile, khuryo khwaaboone mu shiriimba sha Wele weefwe, Umukasya Umukhulu; Wele umweene niye ushiliinda biifukhu byoosi.

⁹O Wele, ifwe khwaambaasa khu khukana khwoowo khukhuukhakama ta, nga khuli mukari mwe Lisaayilo lyoowo Likhulu.

¹⁰O Wele, nga lisiina lyoowo ni lili, lubuyi lwoowo lwamalatana mu shibala shoosi; kumukhono kwoowo kwayitsula buwuli bukali.

¹¹Lekha lukiingi Sayuuni lusangaale! Ni biriimba byoosi bya Yuda bitsule kumwikhoyo lwekhuuba iwe ukhala kimisaango kya ŋali!

¹²Baandu ba Wele ni mukyeende khukhwibotokhelela Sayuuni, mubale kamatikiiyi kyasho kamaleeyi.

¹³Ni mulole mubone kamatikiiyi kaasho kamaleeyi, mwofwaase buli lumako; lwanyuma nio munyale khuboolela be kumuboolo kukwilakho muri,

¹⁴“Wele weefwe uyo, niye Wele biilo ni biilo. Kane abatsake umuraangilisi weefwe biilo ni biilo.”