Read lumasaaba Tsizabuli 49 Bible Online

Tsizabuli 49 - lumasaaba bible

Tsizabuli 49

¹Ni muwulile shino, inywe kamanaambo koosi, ni murekeerese inywe babaandu babaali mu shibala shoosi,

²inywe mweesi atweela baakhulu ni bakyeekhe, bayindifu ni bataambi!

³Kane ise inganikhe bilomo bye kamakyesi, ni khukhwaambaasa khukhwaama mu mwoyo kwase kane khureere khumanya.

⁴Kane ise indeke khukhuru khwase isi lulikha, ise isontsoole byeesi lulikha ulwo sheesi lumanyisa nga ikhupa lituungu lyase.

⁵Lwashiina ise imba ni khuurya mu mbuka ye bikosi, nga baasiku baase baantsibotokheleele?

⁶Babaandu baabi abo nibo beyikina buyiindifu bwaabwe, luundi beebuyila lwe buyiindifu bwaabwe buukali.

⁷Mbaawo umuundu unyala khukhwisikula buulamu bweewe umweene, namwe waawa Wele she buukusi lwe khuusikula buulamu bweewe ta.

⁸Lwekhuuba buukusi bwe buulamu buli bwe angaaki naabi, naluundi mbaawo sheesi umuundu anyala waawayo sishinyala shaamala,

⁹nio anyale khuuba umulamu biilo ni biilo, nga s'atsya khufwa ta.

¹⁰Ilala, ubona ni babaandu bakyesi nabo bafwa, ni basilu ni bakhamanya ta nabo bahela, boosi atweela buyiindifu bwaabwe babulekhela babaandu babaandi.

¹¹Tsiŋani tsaabwe tsirama nga bumenyo bwaabwe biilo ni biilo, iyo niyo isi bamenya kimiboolo kyoosi, ikhaba nga lutweela baaba ni liiswa lilyaabwe khu bwaabwe.

¹²Ne umuundu abe akhaba ni buyiindifu burye, s'abawo biilo ni biilo ta, aba busa nga tsisolo tse mwirome ni bihela.

¹³Nimubone shino nisho shishikholekha khu baandu babeyikina babeene, ni naabo babewulila buulayi nga baabawuliile bakanikha.

¹⁴Bali busa nga kamasheese kakaamala khuukhalilwa kumusaango kwe khuufwa, ni khuufwa khweene nikhwo umwaayi wako ukayila imakoombe. Bakhosefu kane bakawulatsake buli mutikhinyi, ni kimibili kyaabwe kibolele imakoombe, nga kamakoombe niko ingo waabwe.

¹⁵Ne Wele niye ukane ambonese ise mu buulamu bwase, anduse ise mu maani ke makoombe, lwekhuuba umweene niye ukane antsakaanile ise.

¹⁶Ukheyembelela nga waaboone umuundu yeesi ayiindila ta, ikhaba nga shiriifwa sheewe shiloosela.

¹⁷Lwekhuuba umuundu uyo n'alifwa, s'aliitsyakho na shiindu shoosi ta, shiriifwa sheewe sishiliitsya ni naye mu ŋani ta.

¹⁸Ikhaba nga umuundu elaanga khuuba uwe tsikhabi n'aba nga ashiili mulamu, ni babaandu baamubuyila nga ni emala buulayi,

¹⁹naye aliitsya, aloonde khu bakuuka beewe isi baatsya, isi bakhabonelakho luundi buwaanga bwe buulamu ta.

²⁰Umuundu s'anyala waamenya mu shiriifwa imbuka indeeyi ta, shitweela busa aliifwa nga tsisolo ni tsifwa.