Read lumasaaba Tsizabuli 5 Bible Online

Tsizabuli 5 - lumasaaba bible

Tsizabuli 5

¹Rekeeresa bilomo byase, O Umukasya, n'ureyo kumwoyo isi khukhwilootsa khwase.

²Rekeeresa khuulila khwase unjeete, iwe Wele wase luundi Umuyiinga wase, lwekhuuba ise nareerire khuulila khwase isi uli.

³O Umukasya, kumutikhinyi uwulila likono lyase; antsye nga bwasheele ise imbaanayo khuuloomba khwase, lwanyuma naaliindilila sheesi kane untsilemo.

⁴Lwekhuuba iwe s'uli Wele uwikhoyela bubwoonaki ta, naluundi s'ufukiilila bubwoonaki bwakhwiitsa aambi ta.

⁵Iwe s'ufukiilila abo babeyiinga khukhwiitsa is'uli ta, naluundi iwe ubiyila abo boosi babaakhola bye bubwoonaki.

⁶Iwe woonakisa abo boosi babaakanikha bye bubeeyi, ulekelesa abo babaali be bituluungu naluundi be tsimbomelo.

⁷Ne ise, khulwe khuukana khwoowo khuukali, kane ninjilatsake mu ntsu yoowo, indyo ikhwisaayile iwe mu Lisaayilo lyoowo Likhosefu, ni khuukhurya iwe khuukali.

⁸O Umukasya n'unaangirire ise khuukhola byeesi iwe ukana, lwekhuuba baasiku baase bali baakali; n'ungwalaasile kumukhoosi kwoowo ingukyeendatsakilemo.

⁹Lwekhuuba byeesi baasiku baase baloma sibiyikinikha ta, lwekhuuba sheesi bakana nikhwo khukhwoonakisa. Lulimi lwe baasiku silukanikha byaŋali ta, naluundi byeesi bakanikha bili bye bubeeyi byonyene.

¹⁰O Wele, n'ubakhalile kumusaango luundi ubawe shitaambiso; khali babeene bakwiile mu mireko kyaabwe. N'ubasiindikhilise ibulafu khuurula mu moni tsoowo lwe bibyoonako byaabwe biikali; lwekhuuba nibo baakhuminyaaliile iwe.

¹¹Ne khayo abo babaakhwiyikina iwe bekhoye, baryo beembatsake lwe kumwikhoyo busheele. Wamweene n'ubaliinde, nio manya abo babaakhukana basangaalile mwiiwe.

¹²Lwekhuuba iwe, O Umukasya, uwa tsikhabi abo babaakhola byeesi ukana. Buulayi bwoowo bubaliinde nibo nga ingabo.