Read lumasaaba Tsizabuli 50 Bible Online

Tsizabuli 50 - lumasaaba bible

Tsizabuli 50

¹Wele Umukasya, uwe kamaani akanikha luundi waakuukuula shibala khukhwaama ibwaamanyaanga khukhwoola ibukwanyaanga.

²Khukhwaama mu Sayuuni, shiriimba shishibonekha buulayi mu bumiliwu, Wele amweekhamweekha.

³Wele weefwe ni eetsa, s'etsa nga waasilile busa ta; kumulilo kukuliliba kumwinyoowa khuutsya iburaangisi, ni ikhuungu ingali imwibotokhelela.

⁴Wele alaanga likulu liliili angaaki ni shibala khuubawo nga bajulisi nga akhalila babaandu beewe kumusaango.

⁵Wele aloma ari, “Ni mumbuusanisile baakhosefu baase atweela isi samweene indi, abo babaakhola indakaano ni nase nga bawaanayo isaayilo.”

⁶Likulu lyookesanisa buukhosefu bweewe, lwekhuuba Wele umweene ali umukayi we babaandu beewe.

⁷Inywe baandu baase, Ise ndi Wele isi mwisaaya. Ni murekeerese, ni nase kane inganikhe. Inywe ba Isiraeli kane imbakanikhekho ndi mwakhola buubi.

⁸Ise simbekiitsa inywe khulwe tsisaayilo tseesi muwayo ta, namwe lwe tsisaayilo tsintsoshe tseesi muwaanayo buli busheele isi ise ta.

⁹Ise singene ifukiilile biwaanibwayo byeenywe bye tsiwuunwa namwe tsimbusi khukhwaama mu mataala keenywe ta.

¹⁰Lwekhuuba buli isolo yoosi ili mu shisaali ili iyase, akhaba ni tsikhaafu tsitsiili khu ngoongo bikana.

¹¹Binywiinywi byoosi bibiili mu ngaaki ise nabimanya; nabuli shiindu shilamu shoosi shishikyeendela khu shibala shili shishase.

¹²Ise imba nga ubeele intsala, khali sinaababooleele inywe ta, lwekhuuba shibala shoosi ni bibiishilimo byoosi bili bibyase.

¹³Ise siindya inyama ye tsikhaafu, namwe naanywa kamalasile ke tsimbusi ta.

¹⁴Ne ni muwaaneyo isi Wele isaayilo ye khumusiima, mwolelese bibitsubo byeenywe isi Wele Uli Angaaki Lukali!

¹⁵Muryo lwanyuma muntsikoontselele ise mu mbuka iye bikosi, ni nase kane mbaawonese inywe, muryo nanywe muumbe ise shiriifwa.

¹⁶Ne isi baboonaki Wele abalomela ari, “Bunyala shiina bweesi inywe muli nabwo khuukanikha khu makaambila kaase, namwe khuukanikha khu ndakaano yase?

¹⁷Lwekhuuba inywe simukana ise naabaleekela ta, ni bilomo byase mubikaana mwabituuma busa.

¹⁸Ni mubona umuundu umwiifwi, mufukiilisana mwaatsya ni naye, naluundi mwetubaasa ni babaandu bayeyani.”

¹⁹“Inywe mukanikha bye bubwoonaki byonyene, naluundi mukanikha bye bubeeyi byonyene.

²⁰Buli imbuka mwikhalila khuukuta babandaayeenywe ni khuubakhupa lihino.

²¹Inywe mubeele mukhola bibiindu bino nga ise naasilile busa, muryo mwaambaasa muri ise ndi busa nga inywe ni muli. Ne ari ise mbekiitsa inywe, naluundi ise imbatsuntsumilisa.”

²²“Ne ari ni mwaambaase khu shino inywe babaakhenaanayo isi Wele ta, kane ise imbatyenuulakemu busa ilekhe khubawo na mutweela uwonesebwa ta!

²³Umuundu yeesi uwaanayo isaayilo ye khusiima aba antsisamo ise shiriifwa, naluundi aba ali uwunondelela ise. Ni nase nga Wele kane imwokesanise buwonesi.”