Read lumasaaba Tsizabuli 51 Bible Online

Tsizabuli 51 - lumasaaba bible

Tsizabuli 51

¹O Wele, n'umaambile ise shiisa lwe khuukana khwoowo khukhuukhakama ta. Lwe shiisa shoowo shikali n'undusekho shishoonako shase.

²N'usiingile ise ilala khukhwaama mu byoonako byase byoosi, umiliise ise khukhwaama mu shiibi shase.

³Lwekhuuba ise naamanya bubwoonaki bwase nga ni buli, ni bibyoonako byase byoosi ise naabimanya.

⁴Ise naayoneka isi iwe, isi iwe wenyene, ise naakhola ibyo bibikhali biilayi ta mu moni tsoowo. Nashiryo shili sha ŋali luundi shaakhila iwe khukhuukhalila ise kumusaango ni khukhuumba ise shitaambiso.

⁵Ilala, ise khukhwaamila khu khusaalikha khwase indi umwoonaki, ise ndi umwoonaki khukhwaama khu mbuka isi maayi wase aasaalila ise.

⁶Ne mwilala iwe ukana kumwoyo kukuuli kwa ŋali, uryo n'undeekele ise bye kamakyesi ke shimoonyo.

⁷N'usiinge ise ni shishaangwe shoowo, ni nase kane imbe umumiliwu; n'usiinge, ni nase kane imbe umuwaanga, ikhose khuufuura kamabeele ke khaafu.

⁸N'untsitsusemo ise kumwikhoyo ni sangaalo. Abe iwe waafuniaakaka kamakuumba kaase, ne ari ise khanikhoye.

⁹Ukhashebulila bibyoonako byase byeesi ise nakhola ta, rusilawo ilala bubwoonaki bwase bwoosi.

¹⁰O Wele, n'umuumbile musiise kumwoyo kumushaakha, undemo ise kumwoyo kukuuwulila imbe luundi umwiyikinwa.

¹¹Ukhaandimisa ise khuutsya naarura mu moni tsoowo ta, namwe waandusakho ise Umwoyo woowo ta.

¹²N'ungobosemo ise kumwikhoyo kwe buwonesi bwoowo, undemo ise khuubamo kumwoyo kukuuwulila, untsayise ise.

¹³Nio lwanyuma nase indeekele baboonaki kamakaambila koowo, nio akile baboonaki beene bakobole is'uli.

¹⁴O Wele, n'umbonese ise khukhwaama isi shitaambiso she khuufwa, iwe niye Wele we buwonesi bwase. Ni nase ndyo kane ikhuruuye iwe ni kumwikhoyo khulwe buwonesi bubwaama is'uli.

¹⁵O Umukasya, iwe n'ukaangulule kiminwa kyase, ni nase kane ingukuule lubuula nga ikhuruuya iwe.

¹⁶Lwekhuuba iwe siwikhoyela tsisaayilo ta, ne busa khali naatsikhurereere. Iwe siwikhoyela tsisaayilo tsintsoshe ta.

¹⁷Tsisaayilo tsitsiikhoyesa Wele nikwo kumwoyo kukwibiiyisa. Kumwoyo kukwibiyisile naluundi kukuuli kumuwolu, Wele singene akulobe ta.

¹⁸Umukasya, n'uwaambile Sayuuni shiisa nio akile abe buulayi, wombakhe bushaakha kamatikiiyi ke shiriimba Yerusalemu.

¹⁹Nio nawe wikhoyele tsisaayilo tsitsaakhila, tsisaayilo tsintsoshe tseesi iwe usiima. Ndi nio nafwe khunyale khuuwaanayo tsiwuunwa khu sheeso shoowo.