Read lumasaaba Tsizabuli 52 Bible Online

Tsizabuli 52 - lumasaaba bible

Tsizabuli 52

¹Iwe umusaani uwe kamaani, lwashiina wibuyila lwe buubi bwoowo? Lwashiina iwe wibuyila lwe buubi bubuukholekha khu baandu babesaaya Wele? Ne shiisa sha Wele shibawo biilo ni biilo.

²Buli mbuka ukhola tsimbomelo tse khuuhesa babaandi. Lulimi lwoowo lwaamema nga buweembo, lwikhala luyiiya bye bubeeyi.

³Iwe ukana naabi khuukhola buubi buukali khufuurisa khuukhola buulayi, ukana naabi khuukhola bye bubeeyi khuufuurisa khuukanikha bya ŋali.

⁴Iwe ukana naabi khuutsiinisa babaandu babaandi ni bilomo byoowo bye bubeeyi.

⁵Ne Wele kane akhukhupe iwe akhuminiangulile ilala; kane akhuwutule iwe luundi akhwinuulakemo nga akhurusa muungo mwoowo. Alikhukhuula akhuruse mu shibala she babaandu baalamu.

⁶Nio babaandu bakwalaafu nga baashiboone babe ni khuurya, baryo lwanyuma bamutsekhelele busa nga baloma bari,

⁷“Ni mubone umuundu abe ukhanyala khukhwiyikina Wele khuuba bubwibisilo bweewe ta, ne nga abe eyikina busa buyiindifu bweewe nga akhola babaandu babaandi buubi!”

⁸Ne ise ndi buulayi nga kuusaala kumu Zeyituni kukutsowa mu ntsu ya Wele. Ise niyikina khuukana khwa Wele khukhuukhakama ta, biilo ni biilo.

⁹Ise kane ikhuruuyatsake iwe, O Wele, biilo ni biilo khulwe isho sheesi ukholile. Kane ise imbe ni kumwiyikino mu lisiina lyoowo lwekhuuba lili liilayi. Indishikanikhakho mu lubuula mu moni tse bakhosefu boowo.